Me ftesë të përfaqësuesit special të Bashkimit Evropian për dialogun ndërmjet Kosovës dhe Serbisë, Miroslav Lajçak, delegacionet teknike të Kosovës dhe Serbisë diskutuan për ndalimin e përdorimit të dinarit serb në Kosovë.
Përfaqësuesi evropian Lajçak pas takimeve theksoi se ky ishte një hap i parë i rëndësishëm, por se do të nevojiten takime shtesë, transmeton Anatolia.
“Përshëndes përkushtimin e palëve për të gjetur një zgjidhje të qëndrueshme për komunitetet e prekura nga dekreti i fundit i BQK-së. Takimi i sotëm i dialogut ishte një hap i parë i rëndësishëm, por shumë pyetje politike mbeten pa përgjigje. Do të duhen takime shtesë”, ka shkruar Lajçak në rrjetin social X.
Lajçak fillimisht zhvilloi takime dypalëshe me të dyja delegacionet dhe më pas përfaqësuesit e dy vendeve u takuan me njëri-tjetrin. Në delegacionin kosovar ishin përfaqësues të Bankës Qendrore të Kosovës, të kryesuar nga guvernatori Ahmet Ismaili.
Rregullore e BQK-së
Siç është raportuar nga BQK-ja, Rregullorja e Bankës Qendrore nuk është vënë në pikëpyetje apo kontestim, por janë ngritur shqetësime të caktuara lidhur me ndikimin e mundshëm të komunitetit serb tek qytetarët e Kosovës.
“BQK-ja ka përpunuar në detaje zgjidhjet e mundshme teknike për transferimin e mjeteve përmes kanaleve bankare në mënyrë që të lehtësojë zgjedhjen e opsionit më të lehtë për procesin e transferimit të mjeteve në llogaritë e përdoruesve (në euro), në përputhje me rregulloret ligjore në fuqi”, thuhet në deklaratë.
Shtohet se delegacioni i Bankës Qendrore të Kosovës, me sugjerim dhe në organizim të BE-së, është takuar edhe me delegacionin teknik të Ministrisë së Financave të Serbisë, me të cilin kanë biseduar për opsionet e paraqitura nga BQK-ja dhe kanë diskutuar lehtësinë e zbatimit të tyre në praktikë nëse ka vullnet nga ana e dërguesit, pa ndryshime në kuadrin ligjor në fuqi.
Rregullorja e Bankës Qendrore të Kosovës, e cila është miratuar në fund të dhjetorit të vitit të kaluar, ka hyrë në fuqi më 1 shkurt të këtij viti. Partnerët ndërkombëtarë, mbi të gjitha Shtetet e Bashkuara të Amerikës dhe BE-ja, kërkuan që të pezullohet Rregullorja e Euros derisa të gjendet alternativë për pagesën e pagave, pensioneve, përfitimeve sociale dhe të tjera nga Serbia, të cilat arrijnë në euro. /tesheshi.com/
