Publicisti i njohur Milazim Krasniqi, ka ofruar një konstatim që sipas tij, tregon qerthullin absurd ku është futur Kosova në tentativën e saj për shtetndërtim. Në një postim të shkurtër në FB, Kransiqi me pak fjalë ka përçuar atë që konsiderohet ngërçi më i madh që ka Kosova sot:
- Kosovën si shtet të pavarur nuk e njeh OKB-ja, ndërsa ka ushtruar e ushtron pushtet në Kosovë (UNMIK)!
- Kosovën si shtet nuk e njeh as Bashkimi Evropian, por ushtron pushtet në Kosovë (fillimisht Shtylla e Katërt, tash EULEX!)
- Kosovën si shtet të pavarur nuk e njeh as OSBE-ja, por ka ndërtuar e “mirëmban” institucionet e Kosovës!
- Kosovën nuk e njeh si shtet Rusia, por ka zyrë me shumë personel në Kosovë! A nuk ju duket absurde kjo kundërthënie e shtetndërtimit tonë: na ndihmojnë ata që nuk na pranojnë dhe që duan të na zhbëjnë! Mua po.
Ky ishte konstatimi katërpikërish i Krasniqit, për të cilin ndoshta do duhej një konferencë edhe me ndërkombëtarë, për ta shqyrtuar e shoshitur.
Që prej përfundimit të luftës, roli i ndërkombëtarëve në Kosovë ka qenë thikë me dy tehe: nga njëra anë është parë si përkujdesje atërore për shtetin e ri, e nga ana tjetër si një tutor i bezdissshëm që ka shkaktuar jo pak pasoja. /tesheshi.com/
