Të gjithë diplomatët e Serbisë në Maqedoni u tërhoqën për konsultime urgjente në Beograd.
Ky veprim u bë si presion i hapur i Serbisë ndaj Maqedonisë për të ndikuar votën e saj për hyrjen Kosovën në UNESCO.
Analistët e shohin në një kontekst më të gjërë këtë acarim të marrëdhënieve të Beogradit me Shkupin pas ardhjes në pushtet të Zoran Zaevit.
Për analistin politik Selim Ibraimi ky veprim i Beogradit duhet shikuar në një kontekst më të gjërë. Sipas tij, këtu kemi të bëjmë me një pakënaqësi serbe. Ai shprehet se Beogradi po ndeshet me disa vështirësi në implementimin e politikave ekspansioniste.
“Gara gjeopolitike në mes vendeve të Ballkanit Perëndimor, është evidente dhe këtu Beogradi po ndeshet me disa vështërësi në implementimin e politikave ekspansioniste. Raportet e reja që qeveria e Shkupit përpiqet t’i vë me fqinjët dhe rendi i ri, me siguri nuk ju përshtatet qeverive rajonale”, ka deklaruar Selim Ibraimi duke folur për DW.
Ndërsa analisti Sadri Ramabaja thotë se Maqedonia është vendi më i vogël në Ballkan, megjithatë ajo ka kohë që është shndërruar në pikën më nevralgjike të përballjeve me karakter gjeostrategjik. Sipas tij, në Maqedoni tashmë është stacionuar numri më i madh i diplomatëve amerikanë në rajon. Ofensiva serbe duket e koordinuar me atë ruse, vlerëson Ramabaja për DW.
“Fatkeqësia është se Beogradi edhe më tej shërben si trampolinë e interesave ruse në Ballkan. Tërheqja e diplomatëve serbë nga Maqedonia, është një përpjekje dëshpëruese për t’i ikur përballjes me realitetin që do ta shpërfaqte Gjykata, tashmë i pakontrollueshëm dot, nga VMRO-DPMNE”, thekson Ramabaja./tesheshi.com/
