Të hënën në mbrëmje, ORF shfaqi një intervistë me shkrimtarin Peter Handke, si pjesë e emisionit Kulturmontag. Sipas njoftimit bëhet fjalë për “një nga intervistat e tij të rralla televizive”. Megjithatë, ky sukses i supozuar gazetaresk doli të ishte një dështim i plotë. Fituesi i Çmimit Nobel në Letërsi 2019 shfrytëzoi rastin për të mohuar dhe nënvlerësuar edhe një herë gjenocidin e Srebrenicës, kryer nga serbët e Millosheviçit, ish-mikut të tij në të gjallë.
“Sipas mendimit tim, ajo që ndodhi atje ishte një luftë vëllavrasëse”, tha Handke në intervistë. Ai vazhdoi duke thënë se “gjenocidi është një term ligjor, por vëllavrasja është një term biblik, dhe kjo është ajo që ndodhi. Dhe nuk ka budallenj që të më thonë çfarë fjalë të përdor – budallenjtë që nuk kanë asnjë ide për gjuhën, rrokjet, ritmin dhe melodinë.” Pas kësaj, prezantuesi nuk bëri pyetje shtesë dhe tema u ndryshua.
Gjenocidi në Srebrenicë në korrik 1995 përfaqëson krimin më të rëndë të luftës në Evropë që nga fundi i Luftës së Dytë Botërore. Nën komandën e Ratko Mlladiçit, forcat serbe të Bosnjës vranë mbi 8,000 boshnjakë muslimanë në atë që atëherë ishte një “zonë e sigurt” e mbrojtur nga OKB-ja. Masakra ishte planifikuar dhe kryer në mënyrë sistematike dhe gjykatat ndërkombëtare e kanë cilësuar qartë si “gjenocid”.
Në vitet 1990 dhe 2000, Handke u përball me kritika të ashpra për qëndrimin e tij ndaj kriminelëve serbë të luftës. Në dhjetor 1996, ai u takua me kriminelin Radovan Karaxhiç, i cili atë kohë ishte paditur nga Gjykata e OKB-së për gjenocid në Srebrenicë dhe krime kundër njerëzimit.
Në tekstet e tij, Handke e quajti Srebrenicën një “gjenocid të supozuar” dhe foli për “vende të supozuara të masakrës”.
Duke marrë parasysh të kaluarën e tij, është e vështirë të kuptohet pse ORF i dha Handkes hapësirë mediatike pa ndonjë kornizë kritike. Deklaratat e tjera të tij ishin gjithashtu problematike: ai tha se nuk mund ta duronte më fjalën “demokraci” dhe pretendonte se atdheu i tij i dytë, Franca, nuk ishte një demokraci e vërtetë. “Franca është një demokraci, por me shumë diktaturë e vogël”, deklaroi ai pa shpjegime të mëtejshme.
Gjatë intervistës, Handke injoroi tërësisht kritikët ndaj tij. “Asnjë fjalë e vetme që kam shkruar për Jugosllavinë nuk është e dënueshme, asnjë fjalë e vetme. Është letërsi,” pohoi ai. /tesheshi.com/
