Përfaqësuesja evropiane dhe kandidatja kryesore e grupit politik të të Gjelbërve për presidente të Komisionit Evropian, Terry Reintke nga Gjermania, mbështet hyrjen e Ballkanit Perëndimor në BE dhe vlerëson se ka një moment të ri në bllok për sa i përket zgjerimit.
“Unë jam një mbështetëse shumë e madhe e hyrjes së vendeve të Ballkanit Perëndimor në BE,” tha Reintke në një intervistë për redaksinë evropiane (ENR).
Ajo theksoi se për të hyrë në BE duhet të plotësohen disa kritere, sidomos kur bëhet fjalë për sundimin e ligjit dhe zbatimin e reformave në drejtësi.
“Por unë mendoj se tani, ndryshe nga ndoshta dhjetë vjet më parë, ne kemi një moment të ri sa i përket anëtarësimit në BE dhe kështu shpresoj për vendet e Ballkanit Perëndimor se do të shohim një momentum pozitiv, si në reforma ashtu edhe në në afrimin e BE-së”, tha Reintke.
Kur bëhet fjalë për zgjedhjet evropiane dhe dëshirën e presidentes aktuale të Komisionit Evropian, Ursula von der Leyen, për t’u rizgjedhur në atë post pas zgjedhjeve, për të cilën ajo ka nevojë për një shumicë në Parlamentin Evropian, e cila mund të varet nga votat e të Gjelbërve, Reintke kërkoi që me shkrim të shihen angazhimet e saj për ta mbështetur për të marrë një mandat të ri.
“Do të më duhet t’i shoh gjërat në letër përpara se të votoj në një mënyrë të caktuar,” tha ajo, duke shtuar se ajo besonte se Von der Leyen aktualisht po ndjente presion, veçanërisht nga Partia Popullore Evropiane (EPP), grupimi më i madh politik në Evropë, të cilit ajo i përket dhe për të cilën ajo mbështeti kandidaturën e saj për kryetare të Komisionit Evropian, e cila duhet të konfirmohet zyrtarisht në kongresin e PPE në fillim të marsit.
Reintke kërkoi vazhdimin dhe zgjerimin e politikës mjedisore dhe klimatike të BE-së dhe vlerësoi se nevojiten investime në infrastrukturë, rinovim dhe transformim të gjelbër të kompanive. /tesheshi.com/
