Mungoi në Tiranë, në samitin midis vendeve të BE dhe Ballkanit Perëndimor, por Albin Kurti nuk i ka anuluar takimet në Londër, e tanimë në Romë.
Shefi i qeverisë së Kosovës ka udhëtuar për në kryeqytetin e Italisë, ku do të mbahet Kongresi i Partisë së Socialistëve Evropian (PES), i përqendruar rreth zgjedhjeve evropiane të 9 qershorit 2024.
Nga aty, Kurti ka dhënë një intervistë për median italiane Agin, ku flet për vështirësitë ne dialogun dhe marrëdhënien me Serbinë. Duke iu referuar bandave serbe që operojnë në veri, ai i akuzon duke thënë se “ata që u pasuruan me luftën janë kthyer në kriminelë”.
“Ka ende probleme në kufirin me Serbinë. Fatkeqësisht ata që u pasuruan me luftën janë kthyer në kriminelë
dhe vazhdojnë të pasurohen me bitcoin, drogë dhe armë. Ata e mbulojnë biznesin e tyre me ide nacionaliste, por janë ende kriminelë.”
Sa i përket aplikimit të Kosovës për anëtarësim në Bashkimin Evropian, të cilin Prishtina e dorëzoi më 15 dhjetor 2022, Kurti thotë se “nuk jemi ende zyrtarisht kandidatë për anëtarësim”.
“Por po bëjmë çmos që sa më shpejt t’i afrohemi Bashkimit Evropian”, theksoi kreu i ekzekutivit kosovar.
I pyetur për përplasjet e tij të forta me “Listën Serbe”, Kurti u përgjigj:
“Ata flasin për nacionalizëm dhe patriotizëm, por në realitet kanë ide fashiste dhe lidhje me Vuçiçin e Putinin”.
Sa i përket marrëdhënieve mes Kosovës e Italisë, Kurti shprehet: “Duhet të jem i sinqertë. Në të kaluarën e konsideroja Giorgia Melonin të lidhur me të kaluarën e saj të djathtë, me fashizmin. Që kur u bë kryeministre kam vënë re marrëdhëniet e saj të shkëlqyera me Biden dhe SHBA. Nuk mendoj kështu për Salvinin që ka marrëdhënie me Putinin.” /A2CNN/
