“Kisha Dhërmiut”, një çështje e nxehtë e verës që kaloi, është rikthyer sërish si debat politik, kësaj herë në parlament dhe mes dy ish-miqeve sot “armiq”, Vangjel Dules dhe Edi Ramës, njëri si deputet e kryetar i PBDNJ-së e tjetri si kryeministër. Dule ka thirrur një interpelancë për atë që faktori grek në Shqipëri e ka quajtur dhunim të rëndë të ortodoksisë me prishjen e një godine në Dhërmi nga ana e Inspektoriatit Ndërtimor, e që pretendohet se është një kishë e vjetër. Por Rama mendon ndryshe dhe ja ç`përgjigje i kthen Dules:
“Ngrehina e rrëzuar, për të cilën ju dhe shumë të tjerë bëtë kaq shumë potere, nuk është kisha martire e Shën Thanasit, dhe nuk ka qenë kurrë kishë.
Kanonet kishtare na mësojnë se jo çdo objekt kulti meriton të quhet kishë.
Ajo ngrehinë nuk ka qenë ndonjëherë e shuguruar konform rregullave nga Autoriteti Kishtar. Objekti i interpelancës është nul pasi Inspektorati Ndërtimor nuk ka shembur kishë. Ajo ishte ngrehinë, garazh apo stallë pa leje, e ndërtuar nga brutaliteti individual i viteve ’90”.
S’e kam kuptuar asnjëherë se si ju dhe vëllezërit tuaj me kombësi greke ndiheni pronarë të ortodoksisë në Shqipëri.
Dua t’ju kujtoj se ortodoksët shqiptarë nuk kanë qenë kurrë dhe nuk do të jenë kurrë grekë dhe liritë e tyre nuk janë në asnjë juridiksion tjetër përveçse në atë të republikës së Shqipërisë”.
/tesheshi.com/
