Presidenti amerikan është detyruar t’i ndryshojë planet e tij të mëhershme për të lënë vetëm një forcë të vogël në Afganistan para se ta dorëzojë detyrën e tij. Shpërthimi i sulmeve talibane dhe marrja prej tyre e Kunduzit muajin e shkuar kanë sjellë një ndryshim të strategjisë.
Obama ka deklaruar dje se Shtetet e Bashkuara të Amerikës do të vijojnë të kenë një rol ushtarak në Afganistan, e se forca aktuale prej 9.800 trupash amerikane do të qëndrojë në të në thuajse tërë vitin e ardhshëm.
Në përputhje me planin e ri, numri i trupave amerikanë do të bjerë në 5.500 gjatë 2017-ës, dhe ata do të jenë të përqendruar në Kabul, Begram, Xhelalabad e Kandahar.
Duke folur në konferencën e shtypit në Shtëpinë e Bardhë, presidenti amerikan tha mes të tjerash se nuk e mbështet idenë e luftës pa fund, por megjithatë ai është i bindur se SHBA-të nuk mund ta “lejojnë Afganistanin të përdoret si një strehë e sigurt” për grupet e armatosura, si el-Kaeda dhe talibanët.
Me ndihmën e sulmeve ajrore amerikane, forcat afgane do ta rimerrnin nën kontroll qytetin e Kunduzit javën e shkuar.
Gjithsesi, nga një prani e më tepër se 100.000 trupave në Afganistan, Obama e zbriti dalëngadalë numrin e tyre në 9.800 me ardhjen e tij në detyrën e presidentit të SHBA-ve.
Ndërhyrja ushtarake e SHBA-ve në Afganistan nisi në fillim të vitit 2002, dhe që atëherë në atë vend ka patur një prani të vazhdueshme të trupave amerikane. /tesheshi.com/
