Kërmijtë afrikanë, deri në 20 centimetra të gjatë, janë kafshë shtëpiake gjithnjë e më të zakonshme në familjet evropiane, por një universitet zviceran paralajmëron se kjo nuk është një gjë e mirë.
Këto kafshë mund të jenë të rrezikshme për njerëzit, sepse ato mund të shkaktojnë meningjitin tek njerëzit, raportoi një ekip shkencëtarësh nga Universiteti i Lozanës në revistën shkencore Parasites & Vectors.
Ata shtojnë se afërsisht dy të tretat e të paktën 36 patogjenëve të njohur në kërmijtë mund të infektojnë njerëzit. Llojet e njohura në terrariumet evropiane janë kërmilli gjigant afrikan (Lissachatina fulica) dhe kërmilli agat aziatik (Achatina achatina).
“Rrjetet sociale janë plot me foto të pronarëve krenarë që vendosin kërmijtë në lëkurën e tyre apo edhe në gojë”, tha zoologu Cleo Bertelsmeier i Institutit të Ekologjisë dhe Evolucionit të Fakultetit të Biologjisë dhe Mjekësisë në Lozanë.
Ajo tha se njerëzit besojnë se zhulja e kërmillit është e mirë për lëkurën, por mund të jetë e rrezikshme për shkak të transmetimit të patogjenëve.
Bertelsmeier dhe kolegët e saj, pasi analizuan fotot e shumta të publikuara në rrjetet sociale, zbuluan se kërmijtë gjigantë mbahen në shtëpi si kafshë shtëpiake.
Ata paralajmërojnë se shumë prej tyre nuk janë të vetëdijshëm për rrezikun “për të cilin ata ekspozojnë veten dhe fëmijët e tyre kur, për shembull, i vendosin në fytyrë“, tha bashkëautori i studimit, Jérôme Gippet.
Studiuesit paralajmërojnë se nëse tregtia e kafshëve shtëpiake rritet, “do të ketë më shumë mundësi për të futur dhe përhapur patogjenë të dëmshëm te njerëzit dhe kafshët e tjera”.
Kërmijtë e agatit janë të pangopur dhe riprodhohen shpejt. Bashkimi Ndërkombëtar për Ruajtjen e Natyrës (IUCN) i përfshiu ato në listën e specieve të rrezikshme pushtuese dhe i vendosi në kategorinë e dëmtuesve. /tesheshi.com/
