Pas humbjes së radhës së opozitës në zgjedhje, në Lokalet e 14 majit, shumë më rëndë se në çdo garë tjetër elektorale që nga 2013-ta, Berisha, lideri historik i PD-së u gjend sërish nën sulm nga kritikë të tij, brenda kampit opozitar, duke thënë se duhet të ikë? Të ikë nga ku, nga PD-ja apo nga politika?! Nga politika nuk do të ikë dhe është e drejta e tij të zgjedhë të mos ikë, si shumë e shumë si ai, në çdo kohë e vend. Ndërsa nga PD ishte i ikur në zgjedhje, në kuptimin që kandidonte nën tjetër logo – Bashkim për Fitore, në aleancë me Metën.
PD-ja zyrtare pra ishte pa të në krye. Pra ishte e çliruar nga Berisha, me shansin për ta treguar freskinë e saj pa barrën e një njeriu që mëtohet t’i jetë barrë. Sigurisht që humbi dhe më rëndë se Berisha. Pra, prova rezultoi një dështim total.
Sepse si largohet Berisha, nëse ai vetë nuk do të largohet(siç)? Me konkurencë, me votë. Ndaj dhe replika mes tij dhe të riut Endri Shabani në një paraqitje televiziv ishte në fakt një fitore inteligjente e Berishës në një minutë dialog.
“Ju duhet të iknit me kohë z. Berisha?”, ju drejtua Shabani.
“Po kush të vinte, ju?”, iu përgjigj Berisha.
“Po, unë”, iu përgjigj Shabani.
“Shko votohu”, ia ngeci Berisha.
Është pra ndër ato raste kur Berisha është jo vetëm pa faj, por korrekt në terma demokratike.
Që do të thotë se nuk është vetëm faji i Berishës pse PD-ja e tij është katandisur si mos më keq, me mundësinë dhe të një shkërmoqjeje totale; është faji i kritizerëve të tij që nuk e sfidojnë dot me rregulla loje.
Nëse Basha, Alibeaj e të gjithë pas tyre nuk e mundin demokratikisht, le të hapin rrugë më mirë, si dhe të heshtin nëse nuk bindin dot.
Fryma anti-Berishë, edhe pse teorikisht ka të drejtë në qasje ndaj Berishës, kishte shansin e 14 majit ta tregonte se mund ta zëvënësojë të pa zëvëndësueshmin deri tani. Nuk ia arriti. E pra nuk është faji i Berishës. Dhe kjo është kriza e vërtetë në PD: që fajtori nuk ka faj! /tesheshi.com/
