Në thuajse 100 qytete të Kanadasë, përfshirë Toronton, Montrealin, Otavën, Edmontonin, Kalgarin dhe Vankuverin, pati në fundjavë marshime proteste kundër një legjislacioni të propozuar antiterror, Bill C-51, që do t’i japë fuqi të mëtejshme agjencisë kanadeze të spiunimit, CSIS, do t’i zgjerojë kompetencat policisë, e do t’i lejojë ato të ndalojnë të dyshuar për terror.
Qeveria konservatore e kryeministrit Harper u kërkon ligjvënësve të miratojnë një projektligj që për herë të parë do ta lejojë shërbimin informativ kanadez, apo CSIS-in, të ndërpresë komunikimet dhe planet e udhëtimit të një të dyshuari.
Kritikët janë të mendimit se ai do të shkelë të drejtat dhe liritë e kanadezëve, dhe droja e disave është se ka për të vënë në rrezik të drejtën për të protestuar dhe për jetë private.
Protestave në Montreal dhe Toronto iu bashkuan dhe udhëheqës nga Partia e Re Demokratike dhe Partia e të Gjelbërve.
Protestuesit mbanin në duar pankarta ku shkruhej, “C-51 është një akt terrori”, “Terrori shtetëror është rreziku i vërtetë”, “Ndal islamofobisë, jo luftës”, “Ndal Harper-it”.
Një deputete e Partisë së Re Demokratike, Peggy Nash, ndërsa iu drejtua turmës para ndërtesës së bashkisë së Torontos, tha, “Nuk do ta lejojmë këtë projektligj të miratohet. Ne e mohojmë islamofobinë dhe jemi kundër kësaj.”
Në protestat u dëgjuan thirrje kundër kryeministrit proizraelit Harper, e të pranishmit e akuzuan qeverinë e tij se po e kthen vendin në një shtet policor. /tesheshi.com/
