Opozita në Tiranë nisi mbrëmjen e djeshme serinë e protestave të paralajmëruara, gjithnjë me motiv dorheqjen e kryeparlamentarit Meta. Sipas një vendimi të forumeve të larta të PD-së, këto protesta do udhëhiqen të Forumi Rinor Demokrat dhe do jenë të vazhdueshme, sa në Tiranë para parlamentit, e po ashtu dhe në qytetet të tjera.
Protesta e së hënës në mbrëmje, pasoi aktin e braktisjes së komisioneve parlamentare nga ana e deputetëve demokratë, duke e përligjur këtë veprim me mospranimin e Metës në krye të Kuvendit. Por a janë këto sinjale për një bojkot të ri parlamentar?! Kjo do shihet ditët në vazhdim, e pikërisht ditën kur do të ketë seancë plenare. Por nëse gjykohet me standartin e bojkotit të komisioneve parlamentare, atëherë i bie ky bojkot do përfshijë dhe punimet e parlamentit.
Parlamenti sapo e ka lënë pas një bojkot të gjatë të opozitës. Ishin ndërkombëtarët ata të cilët negociuan dhe ofruan një marrëveshje mes palëve me disa pika, gjë që çoi në ndërprerjen e bojkotit. Ndër to, ishte dhe dekriminalizimi. Por tashmë, disa zhvillime të fundit të cilat e kanë riacaruar jetën politike e posaçërisht atë parlamentare, po lëshojnë sinjalet e një bojkoti tjetër, që si çdo herë, do kërkojë ndërhyrjen e ndërkombëtarëve.
Sa i përket ngërçit në fjalë, atë që opozita kërkon më ngulm dorheqjen e Metës, ndërkombëtarët ende nuk kanë mbajtur ndonjë qëndrim të prerë, ngjashëm siç e mbajtën me vendimin e grupit të PS-së për largimin e deputetit Doshi, ku si rrallë herë, Ambasada Amerikane dhe Përfaqsia e BE-së në Tiranë lëshuan deklarime mbështetëse njëra pas tjetrës, pak pas vendimit. /tesheshi.com/
