Kryetari i PDK-së, Kadri Veseli, që është njëri nga ish-udhëheqësit e Ushtrisë Çlirimtare të Kosovës, i ka dërguar një letër shoqatave, duke i ka ftuar të kontribuojnë dhe të dalin guximshëm kundër falsifikatorëve të luftës çlirimtare, duke krijuar një evidencë reale të numrit të veteranëve që vërtetë kishin qenë pjesë e saj.
Veseli ka rrëfyer sakrificën dhe luftën e lavdishme të UÇK-së, por edhe për përpjekjet e dashakeqëve që kanë dëmtuar statusin shpirtëror e moral të ushtrisë.
“Falsifikimet në listat e veteranëve, përbëjnë një turp të madh, të cilin nuk mund ta heqin hetimet e prokurorisë, por vetëm ndërgjegjja dhe guximi i secilit veteran për të treguar publikisht të vërtetën, pa marrë parasysh asnjë konsideratë apo lojalitet tjetër, përveç të vërtetës.
E vërteta është instanca që garanton moscënimin e UÇK-së si vlerë sublime kombëtare. Beteja kundër falsifikatorëve të brendshëm dhe atyre të jashtëm të së vërtetës së UÇK-së, është për vetë shtetin e Kosovës, prandaj, ne duhet ta fitojmë pa mëdyshje atë”, ka shkruar Veseli në Facebook. /tesheshi.com/
