Ish-shefi i diplomacisë serbe, Vuk Jeremiç, ka akuzuar struktura të lidhura me pushtetin në Serbi se po pastrojnë paratë e Nikolla Gruevskit.
Jeremiç, i cili ishte një nga kandidatët për President të Serbisë por që mori shumë pak vota, ka kaluar në ofensivë duke denoncuar aferat Beograd-Shkup.
Në një intervistë televizive në B92, Jeremiç tha se ish-shefi i shërbimit sekret maqedonas, Sasha Mijalkov po pastron miliona euro në lëvizje paniku duke shfrytëzuar lidhjet e larta të pushtetit.
Ai përmendi privatizimin e fabrikës “14 tetori” në Krushevo, si një operacion i pastër i pastrimit të parave.
Ndërmarrja “14 tetori” është një fabrikë e kohës së komunizmit që prodhonte dhe rigjeneronte makina të rënda si eskavatorë dhe fadroma.
Ajo u ble nga SCMG, një kompani çeke me bazë në Beograd, e cila është degë e Tatra-s së famshme.
Por Jeremiç në akuzat e tij thekson se operacioni është kryer thjesht për pastrim parash, sa për formë, pasi nuk ka asnjë gjasë që në Krushevo të kryejë dikush investime kaq kolosale sa të prodhojë makina të rënda që kushtojnë shumë, në një qytet që ndodhet 1400 metra mbi nivelin e detit.
“Paratë që kanë qarkulluar në operacionet qindra milionë euroshe janë thjesht lavatriçe”, deklaroi Jeremiç, i cili për një vit ka qenë edhe kryetar i Asamblesë së Përgjithshme të OKB-së. /tesheshi.com/
