Diplomatë të huaj këto ditë janë duke informuar politikanët dhe gazetarët e Maqedonisë, se gjatë kësaj jave dhe fillimin e tjetrës, qeveria Gruevski do të ballafaqohet drejtpërdrejtë me propozime për dalje nga ngërçi politik. Dhe thuhet se në krye të kësaj nisme, do jetë vetë diplomacia amerikane, e cila do t’kërkojë dorëheqjen e ministrave të qeverisë, të cilët afera e përgjimeve i ka apostrofuar si përgjegjësit kryesorë të krizës politike.
Përveç kësaj, mësohet se diplomacia amerikane do të kërkojë edhe qeveri kalimtare, amnesti të përgjithshme për procedurat penale të hapura, ndërsa do të kërkojë ndërprerje të shpalosjes së audio-përgjimeve.
Gjithë kjo situatë korrespondon me paralajmërimet e LSDM-së për intensifikim të shpalosjes së bombave para ndërprerjes së tyre dhe paralajmerimit të Dojçe Velle-s se shefat e diplomacive të BE-së, javën që vjen të miratojnë konkluza me të cilat do të shprehin shqetësimin për krizën politike në vend.
Të enjten, në Shkup do të arrijë Ndihmës/Sekretari Amerikan i Shtetit për Çështje Evropiane, Hojt Li, i cili pritet të takojë Kryeministrin Gruevski, Ministrin e Jashtëm Poposki dhe liderët e partive politike.
Li, do të shoqërohet nga Daniel Baer, në cilësi të Ambasadorit Amerikan në OSBE, i cili ka qenë kritik i ashpër i pushtetit aktual në Maqedoni.
Në opinion, komentohet se diplomatët amerikanë do i paraprijnë të ashtëquajturës “Buldozer Diplomaci” e cila do të udhëheqë transformimit të qetë të pushtetit të Shkupit. /tesheshi.com/
