Nga Entela Duraj
Procesi i hapjes së dosjeve të ish-Sigurimit të Shtetit ka 25 vjet që orvatet qeveri pas qeverie, për të mbërritur deri në ditët e sotme ku hapja e dosjeve të komunizmit , nuk po gjen konsensus mes palëve për hartimin e një ligji të vetëm. Në komisionet parlamentare janë diskutuar dy projektligje të ndarë edhe pse për të njëjtën çështje: nga njëra anë drafti i paraqitur nga Qeveria sipas modelit gjerman dhe nga ana tjetër drafti i opozitës, i prezantuar nga deputetët e PD-së Mesila Dode dhe Shpëtim Idirizi, me pjesëmarrjen edhe të shoqërisë civile.
Dy drafte për një çështje
Por përtej kësaj tymnaje se kush projektligj është më i miri, ajo çka duan ish-të përndjekurit (që janë pjesa më e prekur e kësaj teme), është që të hapen dosjet, pavarësisht se kush ligj miratohet. Simon Miraka, ish kryetar i Institutit të Integrimit të ish të Përndjekurve Politikë të Shqipërisë thotë se janë të lodhur në tërë këto 25 vite me temën e hapjes së dosjeve, edhe pse do të ishte mirë që këto dy propozime ligjesh të gërshetoheshin, boll që të hapen thotë ai. “Ne mbështesim projektligjin e shoqërisë civile sepse mendojmë, pas studimit që i kemi bërë këtij ligji, se i shërben me tepër dekomunistizimit. Ne kemi kërkuar që ligji i hapjes së dosjeve, të jetë paralel me ligjin e lustracionit. Ne kemi kërkuar njëkohësisht që kryetarët e shoqatave, të çdo lloj shoqate të jenë në verifikim; pra që të dihet mirë se kush e drejton këtë vend. Por që një ligj të ketë qëndrueshmëri dhe kohëzgjatje duhet të jetë në konsuensus nga të dyja palët. Megjithatë unë them se sido që të jetë ‘Odisesë; së ligjit të dosjeve duhet t`i jepet fund, se mjaft kemi 25 vjet që presim për dosjet,” thotë Simon Miraka.
Ish të përndjekurit
Por Miraka ka edhe një tjetër kërkesë kur e pyet se a ka emra sot në politikë apo funskione të tjera të larta, ku të jenë të përfshirë ish sigurimsa. “Ato do ti tregojë ligji, verifikimi kur të bëhet, ne dëshirojmë që të bëhet sa më shpejt që të jetë e mundur, por të bëhet kujdes edhe me ata që do të zgjidhen në zgjedhjet e 21 qershorit të mos kemi më njerëz të implikuar me të kaluarën,” thotë Miraka. Sipas statistikave, janë rreth 20 mijë shqiptarë që janë internuar apo pushkatuar nga diktatura komuniste. Sot ata dhe të afërmit e tyre kërkojnë hapjen e dosjeve për të mësuar se kush kanë qenë personat që kanë urdhëruar internimin e tyre.
Shoqëria civile
Por edhe pse drafti i shoqërisë civile nuk është mirëpritur në Kuvend ata nuk do të tërhqien. Sipas Elsa Ballaurit, përfaqësuese e shoqërisë civile dhe që është marrë gjatë me hartimin e këtij drafti, ata po panifikojnë hapin e radhës që do ta bëjnë publik shumë shpejt. “Kjo është një çështje e të gjithëve, dhe nuk duhet ndarë në parcela; ku politika dhe shoqëria civile të punojnë më vete. Është një çështje politike, por pikë së pari është një ëështje shoqërore dhe shpirtërore. Ne jemi përfshirë të tërë në këtë proces dhe jemi në momentin më të mirë për ta filluar procesin për ta diskutuar dhe jo për ta miratuar shpejt e shpejt. Unë ua kam propozuar Ministrisë dhe të tjerëve që po merren me ligjin se ne duhet të bashkëpunojmë dhe të bëjmë një ndërthurje të dy ligjeve, pas deri më tani ne si shoqëri civile jemi mënjanuar dhe unë mendoj se duhet të vazhdojmë me procesin e dekomunstizimit, dhe nuk kemi në plan të dorëzohemi,” thotë Elsa Ballauri lidhur me këtë proces.
/tesheshi.com/
