Arabia Saudite i ka hedhur poshtë pretendimet se nuk i lë iranianët të kryejnë haxhin në Mekë, një pelegrinazh të detyrueshëm për çdo musliman.
Në të kundërt, sipas sauditëve, është Irani që ua bën atyre të pamundur haxhin, duke luajtur lojëra politike.
Një njoftim ditën e shkuar i Ministrisë saudite të Haxhit dhe Umres thotë se delegacioni iranian për haxhin nuk ka pranuar më herët të nënshkruajë një marrëveshje standard me Arabinë Saudite, diçka që është e detyrueshme për çdo vend që dërgon pelegrinë.
Ministria ka sqaruar se 78 vendeve u është kërkuar të dërgojnë delegacionet për haxhin, në mënyrë që të përmbyllen marrëveshjet dypalëshe për haxhinjtë.
“Irani është i vetmi vend që nuk pranoi të nënshkruajë marrëveshjen mbi haxhin,” thuhet në njoftimin e Ministrisë. “Irani nguli këmbë për një numër kushtesh të papranueshme.”
Pasi Arabia Saudite i ka prerë marrëdhëniet diplomatike me Iranin, është bërë e ditur se haxhinjtë iranianë do të pajisen me viza në ambasadën saudite në Dubai. Diçka që nuk u ka pëlqyer autoriteteve iraniane, që kanë kërkuar lëshimin e vizave saudite në Iran.
Dikasteri përkatës saudit është shprehur nëpërmjet njoftimit se nuk pengon asnjë musliman që të vijë për të kryer ritualet fetare për sa kohë u bindet udhëzimeve. “Udhëheqja, qeveria dhe populli i Arabisë Saudite i mirëpresin të gjithë haxhinjtë dhe vizitorët nga e tërë bota, nga të gjitha kombësitë e sektet.”
Me marrëdhëniet mes dy vendeve të tendosura prej kohësh, sauditët e kanë akuzuar Iranin se i bllokon qytetarët e tij të kryejnë haxhin si një prej mënyrave për të ushtruar presion mbi qeverinë e Arabisë Saudite.
Përplasja mes Arabisë Saudite dhe Iranit kulmoi në janarin e këtij viti, teksa ambasada dhe konsullata saudite në Teheran dhe Meshhed u sulmuan nga protestues iranianë. Çka solli dhe ndërprerjen e marrëdhënieve diplomatike nga ana e Arabisë Saudite. /tesheshi.com/
