Nga Bashkim Kastrati
Uji i liqenit nuk është i helmuar dhe mund të përdorët si zakonisht deri më tani. Ky është lajmi që sapo ka ardhur nga Instituti Kombëtar i Shëndetit Publik të Kosovës (IKSHPK).
IKSHPK përmes një komunikate për media tregon se mostrat e ujit të liqenit të Badovcit janë analizuar në laboratoret e IKSHPK dhe në të gjitha mostrat janë testuar parametrat bazik kimik dhe 19 metale dhe që të gjitha rezultojnë brenda standardeve të parapara me rregulloren për cilësinë e ujit për pije, UA 16/2012.
Gjithashtu parametri fizik, turbullira dhe përçueshmëria rezultojnë brenda standardeve të parapara me rregulloret për cilësinë e ujit për pije, UA 16/2012.
Andaj Instituti Kombëtar rekomandon:
- Kompaninë e Ujësjellësit Rajonal që furnizimi me ujë nga Liqeni i Badovcit të normalizohet.
- Kompania e ujësjellësit Rajonal të vazhdoj kontrollin e ujit të pijes në tërë territorin e komunës së Prishtinës.
- Kompania duhet ta ngritë vigjilencën dhe mbrojtjen për siguri të resursit të ujit duke krijuar zonë të rreptë mbrojtëse sipas Ligjeve dhe rregulloreve të MMPH.
Në komunikatën thuhet se IKSHPK do të vazhdojë me monitorimin e cilësisë së ujit për pije sipas kompetencave ligjore në fuqi me përgjegjësi të lartë profesionale.
“Situata epidemiologjike dhe sanitacioni janë në kontroll të vazhduar nga ekipet kujdestare të Institutit Kombëtar dhe çdo ndryshim i situatës epidemiologjike do të pasojë me rekomandime të reja”, thuhet në komunikatën e këtij instituti.
Ndryshe sot është ndërprerë furnizimi me ujë për qytetarët e Prishtinës që furnizohen me ujë nga ky liqen për shkak të dyshimeve se mund të jetë i helmuar nga disa të dyshuar që sot juanë arrestuar nga policia për terrorizëm.
Por edhe zëdhënësi i Policisë së Kosovës ka konfirmuar se nuk ka rrezik që të jetë helmuar uji në liqenin e Badovcit, për faktin se tek të arrestuarit nuk është gjetur asnjë element i dyshuar që do të mund ta helmonte ujin, por sipas tij janë gjetur disa veshje me flamuj me shenja të ISIS-it. /tesheshi.com/
