Duke trajtuar fenomenin e ikjeve massive, ish-ministri Sandër Lleshaj ka sjellë në kujtesë një rregull izraelit mbi frenimin e emigrimit, duke dashur të ngrejë alarmin për atë çfarë po ndodh në shoqërinë shqiptare vitet e fundit, një fenoment dhe tejshqiptar, rajonal dhe më gjerë.
“Migracioni është një fenomen i përjetshëm njerëzor. Problem janë përmasat e tij, të cilat duhet të adresohen. A e dini për shembull se qytetarët e Izraelit duhet të marrin vizë për të shkuar në Amerikë? Dhe a e dini përse? Jo se SHBA nuk është gatshme të liberalizojë regjimin e vizave me aleatin e saj emblematik në Lindjen e Mesme, por se Izraeli nuk do që ta bëjë aq të lehtë migrimin e qytetarëve të tij.
Me këtë nuk dua kurrsesi që të them se ne duhet të aplikojmë masa kufizuese kundër emigracionit. Por, nga ana tjetër, ne nuk mund të rrimë përballë tij si përpara një fenomeni natyror të pashmangshëm. Ka shumë mënyra për të kontrolluar përmasat e tij, ndërkohë që ndalimi as mund të mendohet si opsion”, ka thënë Lleshaj në një interviste të Panorama, pa shkuar më tej në propozime konkrete, por duke i mëshuar kritikës për çfarë ka ndodhur deri më tani, që sipas tij po provokojnë ikjen.
“Obsesioni për vota ka shuar çfarëdo guximi për reforma dhe mungesa e tyre ka goditur natyrisht vetë ata që japin votën, qytetarët. Guximi politik për reforma është edhe guximi edhe për të humbur vota, pa të cilin shoqëria nuk mund të ecë përpara. Në vendin tonë nuk janë kryer kurrë reformat kryesore që do të duhej të ishin realizuar prej dekadash tashmë. Energjia e paorientuar e shqiptarëve në masën më të madhe të saj është kthyer në beton, në vend që të ishte shndërruar në një ekonomi të strukturuar”, shprehet ish-ministri socialist. /tesheshi.com/
