Brukseli zyrtar ka ngritur zërin për të dytën herë por kësaj radhe me një ton më të fortë ndaj akuzave që qarqe politike të caktuara në Shqipëri kanë ndërmarrë ndaj ambasadores së BE-së në Tiranë, Romana Vlahutin.
Media pranë LSI-së dhe ish-kryeministrit Berisha kanë ndërmarrë një fushatë të vazhdueshme kundër diplomates kroate që po udhëheq bashkë me Donald Lu-në një betejë për pastrimin e Drejtësisë shqiptare.
Pasi e akuzuan për korrupsion mbi një vilë që më pas doli se nuk ishte private por pronë e BE-së dhe iu përgënjeshtrua, këto ditë media pranë qarqeve që kundërshtojnë reformën në Drejtësi, sulmuan dhe bashëshortin e Romanës për disa statuse kritike kundër Donald Trump a thua se po shkelte mbi diçka të shenjtë.
Por sot Brukseli nuk ka duruar; ka nxjerrë zëdhënësen zyrtare për të kërkuar publikisht që të heshtin të gjitha sulmet ndaj Vlahutin, duke theksuar se çdo sulm ndaj saj është edhe ndaj Bashkimit Europian.
Zëdhënësja e Federica Mogherinit, Maja Kocijançiç shprehu mbështetje për ambasadoren Romana Vlahutin dhe ka dënuar ato që konsiderohen shpifje ndaj saj.
“Bashkimi Evropian shpreh keqardhje për shpifjet që janë shfaqur në shtyp kundër Delegacionit të BE-së dhe Kreut të Delegacionit në Shqipëri, Ambasadores Romana Vlahutin. BE-ja shpreh besimin dhe mbështetjen e plotë tek Ambasadorja dhe gjithë i ekipi për përkushtimin dhe profesionalizmin e tyre. Delegacioni do të vazhdojë, me përkushtim dhe në koordinim të ngushtë me institucionet e BE-së, ta shoqërojë Shqipërinë në reformën e saj të vështirë të shtetit ligjor për të vendosur një sistem gjyqësor të qëndrueshëm dhe të besueshëm, të cilin qytetarët e Shqipërisë e duan dhe e meritojnë. Shqipëria është një vend kandidat, që siç konfirmohet nga raporti i Komisionit i nëntorit 2016, po bën progres të fuqishëm drejt BE-së dhe ne do të ofrojmë vazhdimisht mbështetjen tonë që ky vrull të vazhdojë”, theksoi Koçijançiç.
/tesheshi.com/
