Përkundër thirrjeve të njëpasnjëshme të politikës për hetim ndërkombëtar të skandalit të mbledhjes së borxheve të CEZ, juristët thonë se kjo nuk është një ndërmarrje e lehtë. Së pari, palët duhet të bien dakord për ndryshime kushtetuese, pasi në ligjin themeltar të shtetit nuk parashikohet që hetues të huaj të marrin përsipër çështje në Shqipëri.
Ish-kryeprokurori, Theodhori Sollaku, në një intervistë për gazetën “Panorama” shprehet se për të pasur një hetim ndërkombëtar për cilëndo aferë në vend, duhet më parë të ndryshohet kushtetuta.
“Nëse ligjvënësi do të ndryshojë kuadrin ligjor për të lejuar hetimin ndërkombëtar të ndonjë çështje, së pari duhet të ndryshojë Kushtetutën, e cila përcakton se ndjekja penale bëhet nga Prokuroria, me prokurorë shqiptar”, thotë Sollaku.
Sipas tij, kuadri kushtetues i Shqipërisë për hetimet penale nuk lejon veprimet hetimore nga persona jashtë subjekteve që parashikon Kushtetuta dhe ligji procedurial penal, që do të thotë, nga prokurorë shqiptarë dhe nga oficerët e policisë gjyqësore.
Ligji për organin e akuzës specifikon se prokurori duhet të jetë vetëm shtetas shqiptar.
Në këtë mënyrë, përpos vullnetit politik për të hetuar skandalin e CEZ-it, të shprehur publikisht nga PD dhe LSI, do të duhen edhe votat në Kuvend për ndryshime kushtetuese.
PD deklaroi para dy ditësh se po harton projektligjin që i hap rrugën hetimit ndërkombëtar të skandalit të CEZ. /tesheshi.com/
