Aleanca për Ardhmërinë e Kosovës reagoi ndaj pretendimeve të ish-kryeministrit Hashim Thaçi në Kuvend se Forcat e Armatosura të Kosovës nuk janë krijuar për shkak të kundërshtisë dhe interesave të vogla të partive opozitare.
Sipas kreut të AAK-së, Ramush Haradinaj fajin e ka Qeveria dhe LDK-ja duke sjellë si argument ngulmimin e kësaj partie për të proceduar në Kuvend krijimin e FAK që në mandatin e parlamentit të kaluar.
“AAK-ja, jo vetëm se nuk mund të cilësohet përgjegjëse për këtë dështim, por përkundrazi duhet të vlerësohet për insistimin e saj të vazhdueshëm që FAK-u, të krijohej qysh në mandatin e shkuar”, thuhet në një deklaratë për mediat të AAK-së.
Partia opozitare e drejtuar nga Ramush Haradinaj thotë se kalimi i çështjes për në sezonin e vjeshtës së parlamentit, i komplikon edhe më shumë gjërat, pasi “trimëron” Listën Serbe në bllokimin e krijimit të Ushtrisë së Kosovës. /tesheshi.com/
