I dërguari special i presidentit amerikan Donald Trump për misione, Richard Grenell, tha se qeveria e kryeministrit të Kosovës Albin Kurti nuk ishte e besueshme gjatë mandatit të parë të Trump dhe tha se retorika e përdorur nga Kurti është absolutisht e rreme.
“Kam shumë miq në Kosovë dhe Shqipëri… dhe shumë miq në Serbi dhe në mbarë rajonin. Administrata Trump ka punuar dhe do të vazhdojë të punojë për paqen për të gjithë në Ballkan. Por ne kemi nevojë për partnerë të besueshëm”, ka shkruar Grenell në rrjetin social X, duke shtuar se qeveria Kurti nuk ka qenë e besueshme gjatë mandatit të parë të Trump dhe as gjatë mandatit të Bidenit.
“Si republikanët dhe demokratët e kanë kritikuar vazhdimisht Kurtin për lëvizje të njëanshme që destabilizojnë rajonin. Si BE-ja dhe NATO-ja. Bashkësia ndërkombëtare është e bashkuar kundër Kurtit. Kompanitë amerikane po zgjerojnë operacionet e tyre në Shqipëri dhe Serbi, por nuk po zgjerohen në Kosovë për shkak të Kurtit”, ka shkruar Grenell.
Ai tha se Kurti ishte kundër çdo ideje amerikane të ofruar nga presidentët Clinton, Bush, Obama, Biden dhe Trump.
“Retorika që Kurti përdor tani, duke pretenduar se është afër SHBA-së dhe më mirë se të gjitha qeveritë e tjera të Kosovës, është absolutisht e rreme. Mos bëni gabim,” tha Grenell. /tesheshi.com/
