Nga Blendi Gashi
Ndërsa ca prej burrave që garojnë për kryetar komune në lokalet e 22 tetorit presin fitore që në raundin e parë, nuk mund të thuhet për gratë që janë pjesë e garës pasi ato kanë fare pak gjasa që dalin triumfuese qysh të dielën.
Nga nëntë gra sa garojnë për të paren e komunës janë vetëm dy prej tyre që kanë gjasat më të mëdha që të arrijnë synimin, të mposhtin kandidatët burra dhe të udhëheqin me qytetin ku garojnë.
Valdete Idrizi, kandidatja më serioze
Padyshim se kandidatja e PDK-së për kryetare të Mitrovicës së Jugut, Valdete Idrizi ka gjasat më të mëdha që të dale triumfuese.
Megjithatë nuk pritet që këtë sukses ta arrijë në rundin e parë, por pas balotazhit. Ajo pritet që të dielën të sigurojë raundin tjetër dhe pas një muaji të ballafaqohet me ndonjërin prej kandidatëve burra. Gjasat më të mëdha që të sigurojnë balotazhin nga burrat i kanë kryetari aktual, njëherit kandidati i AKR-së Agim Bahtiri si dhe vetëvendosësi Fehmi Ferati, por që nuk përjashtohet edhe ai i LDK-së Safet Kamberaj.
Andaj, kandidates së PDK-së do t’i duhet ndihma e ndonjërës prej këtyre partive që t’ia arrijë qëllimit. Mbetet të shihet nëse do ketë sukses.
Mimoza Kusari-Lila, mund të befasojë
Kandidatja e dytë më serioze për të fituar mandatin e kryetares është Mimoza Kusari-Lila, e cila synon të dytin pasi ka udhëhequr në katër vitet e shkuara kur u zgjodh nën petkun e AKR-së së Behgjet Pacolli.
Sigurisht se Mimoza e Alternativës në këto zgjedhje ka gjasa tejet më të pakta se para katër vitesh, megjithatë vlerësohet se mund ta kap të paktën balotazhin.
Kandidati i AAK-së, Ardian Gjini dhe ai i Vetëvendosjes, Driton Çaushi janë kundërkandidatët që kanë gjasat më të mëdha t’ia marrin pushtetin Kusari-Lilës.
Ja pse kandidatet tjera kanë pak gjasa të korrin fitore
Pesë kandidatet e tjera kanë fare pak gjasa të sigurojnë të paktën balotazhin se për fitore vështirë të bëhet fjalë.
Kandidatja e PDK-së në Pejë, Sabiha Shala nuk ka pothuajse fare gjasa të triumfojë pasi përballë do ketë dy kandidatë tejet të fortë.
Fjala është për kandidatin e LDK-së, Gazmend Muhaxheri, që është kryetar aktual dhe kandidatin e AAK-së Fatmir Matoshi. Këta dy të fundit pritet të shkojnë në balotazh.
As kandidatja tjetër e PDK-së, Gonxhe Çaushi e cila garon në Mitrovicën e Veriut nuk ka gjasa të shkaktojë ndonjë befasi. Kjo komunë pritet të udhëhiqet sërish nga Lista Serbe.
Balotazhin e aq më pak fitore nuk pritet ta sigurojë as kandidatja e vetme e LDK-së Hyrijete Isufi kandidate për kryetare në komunën e Hanit të Elezit. Arsyeja është se qytetarët e kësaj komune pritet sërish t’ia besojnë sërish votën të pathyeshmit, kandidatit të pavarur Refki Suma i cili me gjasë do ta fitojë edhe një mandate pa shkuar fare në balotazh.
Edhe Arta Ahmeti-Xhylani, kandidate e AAK-së s’ka kurrfarë gjase të zgjedhet kryetare e Drenasit, pasi gara për të parin e kësj komune do zhvillohet mes Ramiz Lladrovcit të PDK-së dhe Isa Xhemajlaj të NISMA-s, të cilët shkuan në balotazh edhe në zgjedhjet e jashtëzakonshme që u mbajtën në dhjetor të 2016-tës.
Edhe kandidatja e vetme e NISMA-s, Anila Kastrati nuk ka gjasa të fitojë në Gjilan pasi përballë ka konkurencë tejet të forte ku lufta do zhvillohet mes burrave.
Kreu aktual i kësaj komune, njëherit kandidati i LDK-së Lutfi Haziri, ai i PDK-së, Zenun Pajaziti dhe vetëvendosësi Sami Kurteshi do luftojnë për balotazh.
Pa gjasa për të shkaktuar ndonjë befasi është edhe kandidatja e partisë FJALA për kryetare të Pejës Eneida Kelmendi, pasi siç e cekëm më lartë lufta do bëhet mes kandidatit të LDK-së dhe AAK-së.
Pa gjasa për ta siguruar të paktën edhe balotazhin është edhe kandidatja e komunitetit boshnjak, Emilja Rexhepi e cila u kandidua nga partia “Nova Demokratska Stranka” për të paren e Prizrenit.
Edhe në këtë komunë garë e nxehtë do zhvillohet mes burrave, konkretisht kandidatit të PDK-së e LDK-së. /tesheshi.com/
