Gjykata Kushtetuese e Kosovës shpalli sot të pranueshme kërkesën e kryetarit të Kuvendit të Kosovës, një vendim sipas të cilit Amendamenti nr.24 në Kushtetutën e Republikës së Kosovës nuk pakëson të drejtat dhe liritë e njeriut, të përcaktuara në Kapitullin II dhe III të Kushtetutës.
Ndryshimi ka të bëjë me formimin e Gjykatës Speciale për Krime të Luftës.
Në vendim ndër të tjera thuhet se sa i përket hyrjes ne fuqi të amendamentit nr. 24, Gjykata vëren se, teksti nen numrin romak II, qe rregullon atë, është identik me nenin 144, paragrafi 4, të Kushtetutës, ku thuhet: “Ndryshimet e Kushtetutës hyjnë në fuqi menjëherë pas miratimit të tyre në Kuvendin e Republikës së Kosovës”.
Prandaj, Gjykata konfirmon se ky tekst i amendamentit nuk pakëson të drejtat kushtetuese të garantuara me Kapitullin II të Kushtetutës si dhe me Kapitullin III të Kushtetutës dhe me shkronjën e me frymën e saj, siç është përcaktuar në praktiken gjyqësore të Gjykatës.
Si konkludim, për arsyet e lartpërmendura, Gjykata konfirmon se Amendamenti i propozuar nr. 24 nuk pakëson të drejtat kushtetuese të garantuara me Kapitullin II të Kushtetutës si dhe me Kapitullin III të Kushtetutës dhe me shkronjën e me frymën e saj, siç është përcaktuar në praktiken gjyqësore të Gjykatës. Rrjedhimisht, amendamenti i propozuar është në pajtueshmëri me Kushtetutën.
Gjykata, në mbështetje të nenit 113.9 dhe të nenit 144.3 te Kushtetutës, në mbështetje të nenit 20 të Ligjit dhe në mbështetje të rregullit 56 (1) të Rregullores së punës të Gjykatës Kushtetuese të Republikës së Kosovës, në seancën e mbajtur më 14 prill 2015, njëzëri
VENDOS:
- TË DEKLAROJË të pranueshme kërkesën e kryetarit të Kuvendit, të dorëzuar më 9 mars 2015, me Amendamentin nr. 24 të Kushtetutës së Republikës së Kosovës;
- TË KONFIRMOJË që Amendamenti nr. 24 nuk pakëson të drejtat dhe Liritë e njeriut, të përcaktuara në Kapitullin II të Kushtetutës si dhe në Kapitullin III të Kushtetutës dhe me shkronjën e me frymën e saj, siç është përcaktuar në praktikën gjyqësore të Gjykatës;
III. T’UA KUMTOJË këtë aktgjykim palëve dhe ta publikojë atë në Gazetën Zyrtare, në pajtim me nenin 20 (4) te Ligjit; dhe
- Ky aktgjykim hyn ne fuqi menjëherë.
Në Kuvendin e Kosovës u ratifikua Marrëveshja Kosovë-BE, e cila mundëson themelimin e Gjykatës Speciale të Kosovës dhe vazhdimin e mandatit të ristrukturuar të misionit EULEX deri në qershor të vitit 2016.
Me një shumicë votash Parlamenti i Kosovës ratifikoi të mërkurën me datën 23.04 2014 marrëveshjen Kosovë-Bashkim Evropian, e cila mundëson themelimin e Gjykatës Speciale të Kosovës dhe vazhdimin e mandatit të ristrukturuar të misionit EULEX deri në qershor të vitit 2016. Për këtë të fundit do të duhet amendamenti i një serë ligjesh të Kuvendit të Kosovës. 89 deputetë votuan pro themelimit të Gjykatës Speciale, ndërsa 22 votuan kundër.
Të gjitha subjektet politike të përfaqësuara në Kuvendin e Kosovës, me përjashtim të lëvizjes Vetëvendosje, votuan në favor të themelimit të Gjykatës Speciale, ndonëse pothuaj të gjithë thanë se janë në presion nga bashkësia ndërkombëtare dhe janë para një fakti të kryer. Ose Kuvendi i Kosovës ta votojë themelimin e Gjykatës Speciale, ose këtë do ta bëjë Këshilli i Sigurimit i OKB-së. /tesheshi.com/
