Lajm i mirë nga Lozana. Gjykata e Abitrazhit Sportiv i ka dhënë Shqipërisë 3 pikët në tavolinë për ndeshjen me Serbinë që u zhvillua vitin e shkuar në Beograd. Shqiptarët kane pritur gjatë për këtë vendim të merituar, që nga ndeshja e 14 Tetorit të vitit të kaluar.
Cas publikoi në orët e para të kësaj të premte vendimin duke i dhënë fitoren 3-0 në tavolinë Shqipërisë e duke rrëzuar njëkohsisht vendimet e mëparshme të Komisionit të Disiplinës dhe atij të Apelit të Uefa-s, që I kishin dhënë fitoren kombëtares serbe. Një fitore në tavolinë që pothuajse i jep sigurinë e vendit në play-off kombëtares shqiptare por e vendos tashmë në garë dhe për për vendin e dytë apo dhe atë të parë, që të kualifikon direkt për në fazën e finale të Euro 2016. Prej më shumë se 8 muajsh, Shqipëria qëndronte në dyert e gjykatave sportive, por vendimi I Gjykatës së Arbitrazhit Sportiv është më në fund drejtësia e munguar, e cila vonoi por nuk harroi. Shqipëria mori në Lozanë, atë që meritonte të merret që më 14 tetor në Beograd, ku dhuna dhe koret raciste të tifozerisë serbe kishin bërë të pamundur zhvillimin e një ndeshje, e cila duhej të ishte thjesht një sfidë futbolli.
Kryeministri Edi Rama e përshëndeti këtë vendim me anë të një postimi në Twitter: “Supeeeer! Ja ç’ domethënë drejtësi europiane! 3 pikë për Kombëtaren kuqezi në Beograd!!!
Tashmë, situata e pikëve në grup e favorizon vendin tonë duke e pozicionuar me 2 pikë pas Danimarkës dhe me shumë gjasa premton një kualifikim. Serbia zbret poshtë duke pasur situatën më të vështirë të mundshme në grup.
Vendimi është pritur gjatë nga shqiptarët, të cilët jo vetëm ranë pre e dhunës në stadium, por edhe u penalizuan me pikë.
Rrjetet sociale kanë nisur festën për vendimin e dhënë për Kombëtaren nga Arbitrazhi. Në komente mbizotëron ndjesia se Shqipëria më në fund ka marrë Drejtësinë e munguar. Ministrja e Arsimit dhe Sporteve Lindita Nikolla shkruan : “Nga mbrëmja e 15 tetorit pa rënë në mllef, urrejtje, dëshpërim, por pa heshtur e duke besuar fort në drejtësi e FairPlay! “.
Kreu i Opozitës, Lulzim Basha shkruan në Facebook: “Fitore e të vërtetës mbi padrejtësinë. Përpara shqipe!”. “Një fitore për t’u përshëndetur, triumf i Drejtësisë ndërkombëtare!”, shkruan ish-kryeministri Berisha në Facebook. Presidenti Nishani uron Kombëtaren shqiptare. “Përpara”, shkruan ai.
Trajneri i Kombëtares kuqezi, Xhani de Biasi përshëndeti vendimin, duke thënë se është ai që duhej.
“Drejtësia u vu në vend dhe shpresojmë që ndeshjet që na kanë mbetur t’i luajmë me optimizëm të madh. Por duhet të luajmë ndeshjen me Danimarkën, me shpirtin e duhur dhe me këmbët në tokë. Nëse duam të shkojmë direkt në Francë, duhet të bëjmë mirë në ndeshjet e mbetura. Kishim kohë që e prisnim këtë vendim, Nuk mund të them se do të festojmë sot, jam shumë i lumtur sigurisht, sepse kur drejtësia triumfon, të gjithë jemi të lumtur”, tha de Biasi.
Ndërsa në një dalje për mediat, kreu i FSHF-së, Armand Duka e cilësoi vendimin historik, duke theksuar se skuadra shqiptare nuk gjendet fajtore por fajesohet mënyra e organizimit të ndeshjes. Ai tha se futbolli ka fituar me këtë vendim.
Në lidhje me marrjen e 3 pikëve dhe renditjen e skuadrës, Duka tha se duhet bërë më e mira në katër ndeshjet e mbetura. “Mund t’i fitojmë të katërta, por edhe mund t’i humbim”, tha ai, duke shtuar se beson se është hedhur një hap i sigurtë.
Më shumë se tre pikët, tha Duka, fitorja më e madhe është ajo e Drejtësisë në futboll.
“Skuadra shqiptare nuk është fajtore e kjo është fitorja më e madhe”, pohoi edhe përfaqësuesi juridik i FSHF-së.
/tesheshi.com/
