Gjatë natës oficerët e policisë identifikuan pesë huliganë të tjerë kroatë, të cilët dyshohet se kanë marrë pjesë në konfliktin në Athinë, ku humbi jetën 29-vjeçari Michalis Katsouris.
Pesë tifozë janë pikasur nga oficerët e sigurisë në provincën e Thesprotisë në perëndim të Greqisë, në qytetin port të Igumenicës, teksa po përgatiteshin të hipnin në një anije për në Itali, raporton ERT.
Ata u arrestuan dhe fillimisht u sollën në ndërtesën e Drejtorisë së Policisë së Thesprotisë. Pas përfundimit të hetimeve, të pesë kroatët do të transferohen në Athinë. Bëhet fjalë për kroatët e moshës 25, 41, 29, 25 dhe 31 vjeç.
Të gjithë të arrestuarve iu mor mostra e ADN-së për të identifikuar personin përgjegjës për vrasjen e 29-vjeçarit në Athinë.
Tifozët nuk mund të justifikonin konkretisht arsyet e qëndrimit të tyre në vend. Ndonëse deklaruan se ishin me pushime, po udhëtonin pa bagazhe, gjë që ishte mjaft e dyshimtë për policinë.
“Huliganët kroatë u ngjajnë nazistëve”
Portali grek Newsit raporton se tifozët e ndaluar të Dinamos pretendojnë se janë sulmuar jashtë stadiumit të AEK-ut.
“Tifozët nuk mund të shpjegojnë pse kanë mbërritur para OPAP Arena-s të armatosur me shkop dhe thika të mprehta. Kamerat i kapën. Huliganët kroatë pohojnë se kanë ardhur në Greqi për të mbështetur psikologjikisht ekipin e tyre, edhe pse e dinin që UEFA kishte ndaluar vizitat e tifozëve. Ata treguan se si donin ta ndiqnin ndeshjen nga një kafe pranë stadiumit. Natyrisht, askush nuk mund ta përshkruante skenën e vdekjes, pasi ata pretendojnë se nuk kanë dëgjuar dhe parë asgjë”, shkruan Newsit.
“Në bazë të informacioneve që kanë marrë nga policia kroate dhe Europoli, policia greke vlerëson se në mesin e tifozëve kroatë janë katër deri në pesë drejtues. Ata kanë përpiluar një ‘listë të kuqe’ me rreth 40 huliganët më të rrezikshëm, mes të cilëve besojnë se është edhe vrasësi i Mihalis”, shkruan Newsit. /tesheshi.com/
