Kreu i shërbimit të inteligjencës britanike MI6 u ka kërkuar rusëve të zemëruar për pushtimin e Ukrainës që të “bashkohen” me Mbretërinë e Bashkuar për të ndihmuar në ndalimin e gjakderdhjes, një thirrje që sigurisht do të zemërojë Kremlinin.
“I nxis ata të bëjnë atë që kanë bërë të tjerët gjatë 18 muajve të fundit dhe të bashkohen me ne. Dera jonë është gjithmonë e hapur. Sekretet e tyre do të jenë të sigurta me ne dhe ne do të punojmë së bashku për t’i dhënë fund gjakderdhjes”, tha Richard Moore për Politico të mërkurën në Ambasadën Britanike në Pragë.
Një thirrje e ngjashme u bë nga Uashingtoni dy muaj më parë, kur CIA publikoi një video duke u kërkuar rusëve të rebeloheshin.
“Na kontaktoni. Ndoshta njerëzit përreth jush nuk duan të dëgjojnë të vërtetën. Por ne e duam atë”, njoftoi agjencia në një videoklip të shkurtër.
Ofertat për spiunazh mbartin rreziqe të mëdha. Presidenti Vladimir Putin ka paralajmëruar më parë rusët që të mos spiunojnë, pasi ky është një “krim” i dënueshëm me 20 vjet burg.
Gjatë një interviste me Politico para një auditori në ambasadë, Moore tha gjithashtu se spiunët britanikë po përdornin inteligjencën artificiale (AI) për të kapur dërgesat e armëve në Rusi gjatë luftës së saj me Ukrainën.
Një kombinim i aftësive njerëzore me inteligjencën artificiale
Oficerët e inteligjencës britanike “po kombinojnë aftësitë e tyre me inteligjencën artificiale për të identifikuar dhe ndaluar fluksin e armëve në Rusi”, tha Moore, i cili më parë ka paralajmëruar Perëndimin se po qëndron prapa rivalëve të tij në garën e inteligjencës artificiale.
“Së bashku me aleatët tanë, ne synojmë të fitojmë garën për të zotëruar përdorimin etik dhe të sigurt të inteligjencës artificiale,” tha ai.
Ai paralajmëroi se nuk ka “absolutisht asnjë dyshim” se kundërshtarët do të përpiqen të zhvillojnë inteligjencën artificiale në mënyra të pamatura dhe të rrezikshme dhe se është detyra e agjencisë së tij të merret me të.
“Kjo do të jetë një pjesë e rëndësishme e rolit tonë në të ardhmen: të përpiqemi të zbulojmë, ekspozojmë dhe më pas të pengojmë njerëzit që dëshirojnë të zhvillojnë AI në drejtime që janë të rrezikshme”.
Në fjalimin e tij të dytë që kur u bë kreu i Shërbimit Sekret në vitin 2020, Moore tha se kundërofensiva ukrainase kishte rezultuar e vështirë, por ai ishte optimist se Rusia nuk kishte gjasa të rifitonte vrullin në Ukrainë.
Rebelimi i grupit Wagner vetëm “ekspozoi prishjen e paepur të autokracisë së paqëndrueshme mbi të cilën kryeson Putini”, shtoi ai. /tesheshi.com/
