Presidenti turk Rexhep Tajip Erdogan iu përgjigj kritikëve të tij të cilët thanë se reagimi i tij ndaj planit të presidentit amerikan Donald Trump për të larguar palestinezët ishte i vakët.
Në deklaratat para nisjes së tij nga Stambolli për një vizitë në tre vende aziatike, presidenti turk tha: “Dëshiroj ta them qartë: propozimet e bëra nga administrata e re amerikane nën presionin e lobit sionist në lidhje me Gazën nuk kanë asgjë të denjë për t’u përmendur dhe diskutuar për mendimin tonë. Është humbje kohe. Është një përpjekje e kotë”.
“Askush nuk ka fuqinë të largojë popullin e Gazës nga atdheu i tyre i lashtë dhe i përjetshëm mijëra vjeçar. Palestina, me Gazën, Bregun Perëndimor dhe Jerusalemin Lindor, i përket palestinezëve. Pavarësisht nga të gjitha llojet e sulmeve izraelite, populli i Gazës, i cili nuk po e braktis tokën e tij, do të vazhdojë të mbrojë Gazën. Në fjalimin që do të mbaj në Malajzi, do të ndaj (mendimet e mia) se çfarë duhet bërë në Gaza”, tha Tajip Erdogan.
Rexhep Tajip Erdogan i ktheu shigjetat kundër kryetarit të opozitës kryesore, Partisë Popullore Republikane (CHP), Ozgur Ozel dhe kryetarit të bashkisë së Stambollit, Ekrem Imamoglu, të cilët e kritikuan atë për heshtje ndaj deklaratave të Trump-it: “Kam disa fjalë për opozitën kryesore: ne shohim se disa, duke përfshirë presidentin dhe kryetarin e tyre, guxojnë të vënë në dyshim ndjeshmërinë tonë për Palestinën. Si guxoni të vini në dyshim pozicionin tim dhe të qeverisë suaj për luftën palestineze? A nuk jeni ju ata që e etiketuat Hamasin një organizatë terroriste? Fillimisht kërkoni falje për shpifjet tuaja kundër rezistencës palestineze dhe më pas flisni. Duhet të keni pak turp dhe nder. E gjithë bota, veçanërisht vëllezërit tanë palestinezë, e dinë shumë mirë se çfarë kemi bërë për luftën palestineze dhe çfarë kemi rrezikuar për këtë luftë”. /tesheshi.com/
