Presidenti turk, Rexhep Taip Erdogan, ka folur i pashqetësuar nga embargoja ruse ndaj disa sektorëve të ekonomisë. Në një takim më biznesmenë vendas, ai shtjelloi situatën pas vendosjes së sanksioneve, ku bëri me dije se i vetmi sektor i pacënuar prej tyre është energjia.
Sipas Erdogan, nuk ka të dhëna që sanksionet të ndikojnë në projekte të tilla, si gazi natyror apo uzina Akuju e energjisë bërthamore.
Por ai u ndal tek sanksionet mbi ushqimet, importin e tyre drejt Rusisë, ku Turqia shet gati 1 miliard dollarë produkte çdo vit. Erdogan nuk e mohoi dëmin që vjen nga bllokimi i një importi kaq të madh, por tha se do gjenden të tjera dyer e burime për t’i çuar ato.
“Ku qëndron problemi nëse rusët nuk blejnë më prej nesh?”, pyeti në mënyrë sfiduese Erdogan, duke shprehur bindjen se do ketë patjetër një rrugëzgjidhje.
Që prej më shumë se një jave, Rusia është tërbuar nga akti i rrëzimit të një avioni të saj ushtarak prej forcave ajrore turke, me pretendimin e vërtetuar tashmë të Ankarasë zyrtare se u shkel hapësira e saj ajrore.
Sanksionet ekonomike janë më e pakta gjë, pasi nuk kanë munguar as kërcënimet me luftë ndaj Turqisë.
Rusia po përjeton kohë të arta lavdie të ricikluara nga pushteti i Putinit, gjë po shndërrohet në një kërcënim të ri për paqen në botë, si pasojë e delirit të madhështisë që ka kapluar Kremlinin. /tesheshi.com/
