Në Sharm el-Shejh ka nisur një konferencë ndërkombëtare treditore, e cila synon ta sjellë edhe një herë në vëmendje Egjiptin për investitorët e ndryshëm nga bota, në një përpjekje për ta gjallëruar ekonominë e shkatërruar të vendit dhe për të ndryshuar imazhin.
Të pranishëm në nisjen e tubimit qenë 1500 delegatë nga 50 vende, ku mes tyre gjeje pjesëtarë të familjeve mbretërore, kryetarë shtetesh, zyrtarë të lartë ndërkombëtarë dhe afaristë.
E premtja qe e suksesshme, teksa Egjipti mori premtime për 12 miliardë dollarë në investime dhe ndihma nga aleatët arabë të Gjirit Persik.
Presidenti Abdulfettah es-Sisi kërkoi mbështetjen e botës, duke e përshkruar Egjiptin si jetik për stabilitetin e rajonit.
Takimi është parë si një mundësi e artë për es-Sisin, për t’u dhënë fund kritikave dhe për t’u paraqitur ndryshe vetëm dy vite pasi ai udhëhoqi largimin me dhunë nga posti të presidentit legjitim të asaj kohe, Muhammed Mursit. Që atëherë ka patur një fushatë shtypëse ndaj Vëllazërisë Muslimane, me qindra të vdekur e mijëra të plagosur.
Es-Sisi u bëri të ditur delegatëve planin e tij të mëkëmbjes ekonomike, duke thënë se dëshironte ta shihte së paku gjashtë për qind rritjen vjetore të GDP-së në pesë vitet e ardhshme, nga dy që është aktualisht, dhe ta reduktonte papunësinë nga 13 për qind që është tani në 10 për qind. Ai po ashtu premtoi taksim të ndershëm dhe inflacion më të ulët. /tesheshi.com/
