Mesa duket, dhimbja e kokës që Greqia u shkakton zyrtarëve të lartë europianë s’ka për të pushuar me një të gëlltitur paracetamoli. Ditën e shtunë me datë 14 shkurt, zyrtarë të lartë europianë dhe grekë u takuan në Bruksel për të zhvilluar bisedime konsultative. Ky takim u mbajt përpara një tjetër takim vendimtar, që do të mbahet në lidhje me ristrukturimin e borxheve stratosferike të Greqisë.
Një zyrtar i lartë evropian, tha se takimi i së shtunës nuk ishte një negocim, por shkëmbim pikëpamjesh për të kuptuar më mirë pozitën e palëve.
Konsultimet filluan të premten e kaluar, pasi Kryeministri grek Alexis Tsipras në samitin e tij të parë evropian, parashtroi planin e vet përpara kolegëve europianë, ku prezente ishte edhe kancelarja gjermane Angela Merkel.
Frika për daljen e Greqisë nga Eurozona u ringjall sërish, pasi takimi i ministrave të financave të Eurozonës të mërkurën e kaluar dështoi në arritjen e një marrëveshje për shtyerjen e afatit të programit të kredisë, që përfundon në fund të këtij muaji. Program ky që refuzohet tërësisht nga qeveria e re greke.
Evropianët janë duke u përpjekur për të bindur Athinën zyrtare që të bëjë një kërkesë ku kërkon që të zgjatet programi aktual i kredisë, përpara se të mendojë rreth një zgjidhjeje në lehtësimin e borxheve që kanë arritur më shumë se 175% të PBB-së të Greqisë.
Por qeveria e re greke, ka ditur t’ja kompensojë evropianëve këtë fisnikëri, megjithëse arkat e këtij shteti janë bosh, sërish qeveria e re këmbëngul se grekët duhet të shpëtojnë një herë e mirë nga trojka e kreditorëve (Komisioni Evropian, Fondi Monetar Ndërkombëtar dhe Banka Qendrore Evropiane) si dhe nga procedurat e imponuara ndaj saj që nga viti 2010. Alternativë tjetër qeveria greke mesa duket nuk ka, përveçse të bërtasë më shumë kundra zyrtarëve europianë që mundohen të gjejnë zgjidhje për greqinë, në mungesë të zgjidhjeve që ka kjo e fundit për të shpëtuar veten.
Burimi: Le France, Përshtati: Enklid Pelari
