Serbia po merr gjithnjë e më shumë vëmendjen e Shteteve të Bashkuara të Amerikës, dhe sipas gjasave po kthehet në një aleat strategjik të Uashingtonit.
Siç bën të ditur e përditshmja serbe “Danas”, Uashingtoni i ka kërkuar kryeministrit serb, Aleksandër Vuçiç, që të shkëputet totalisht nga varësia e Rusisë, duke i bërë të ditur se Serbia nuk duhet të lidhë asnjë marrëveshje për gazin rus.
Sipas “Danas”-it, zv.presidenti i SHBA, Joe Biden, që ka takuar për të dytën herë pas tre muajve Vuçiçin në Shtëpinë e Bardhë, ka deklaruar se “Kryeministrit Vuçiç ka ndërmarrë një politikë kurajoze”, e cila pritet të vështirësojë shumë marrëdhëniet me Moskën, që nga ana e saj nuk e ka pritur mirë çështjen e gazit.
Biden i ka bërë të ditur Vuçiçit se nuk mund të ketë një rrugë të mesme të ashtuquajtur “diversifikimi i gazit”. Pra, ose do të lidhet me gazësjellësin rus ose me atë që sjell gaz nga Ajzerbaxhani, i cili sponsorizohet nga SHBA dhe BE-ja.
Kjo në fakt përbën thelbin e një intensifikimi të marrëdhënieve mes Serbisë dhe SHBA-së.
Kurrë ndonjëherë nuk ka pasur kaq intensitet diplomatik mes këtyre dy vendeve që u bënë armike të betuara pas bombardimeve në vitin 1999, të urdhëruara nga presidenti i atëhershëm i SHBA-së, Bill Clinton.
SHBA që është donator kryesor i Bankës Botërore ka ndikuar që ky institucion të japë një mbështetje të madhe financiare për Serbinë që pritet të firmoset së shpejti.
Përgatiti Ylli Pata – /tesheshi.com/
