Është larguar nga kjo botë një ndër mendjet akademike më të shquara të periudhës komuniste, Prof. Dr. Alfred Uçi, i njohur si autor veprash të mendimit filozofik e atij estetik. Ai ndërroi jetë në moshën 89-vjeçare.
Ish-partizan, Prof. Uçi kreu studimet e larta për filozofi në Universitetin “Lomonosov” të Moskës (1954). Për një periudhë të gjatë dha lëndët e filozofisë dhe estetikës në UT. Iu kushtua që në fillim studimit të trashëgimisë së mendimit filozofik shqiptar, duke botuar monografi për jetën dhe veprën e Jani Vretos dhe të Theodhor Kavaliotit.
Në vitin 1979–1986 ka qenë drejtor i Institutit të Kulturës Popullore, kryeredaktor i revistës “Kultura popullore” dhe i një vargu botimesh shkencore e dokumentare të atij instituti; në vitin 1987–1990 kryetar i Komitetit të Kulturës e Arteve dhe ministër i Kulturës. Pas kësaj iu kushtua tërësisht punës shkencore duke botuar një varg studimesh nga fusha e estetikës dhe duke marrë në vështrim jo vetëm autorë shqiptarë, po edhe autorë nga më të njohurit e letërsisë botërore. Ka marrë tri herë Çmimin e Republikës të Shkallës së Parë. Publikime (Monografi, Vepra kolektive, Përmbledhje studimesh).
Gjatë karrierës së tij pati një rivalitet me sishokun e tij me mendimit estetik, Prof. Tefik Caushin, edhe ai tashmë i larguar nga kjo botë.
Vite më parë, figura dhe roli i Alfred Uçit shpotitej nga Edi Rama, në emër të urrejtjes së këtij të fundit për artin e realizimit socialist dhe mendimin akademik komunist, përfaqsues i së cilit ishte i ndjeri. /tesheshi.com/
