Zamira Çavo, një emër i njohur i kritikës politike, ka bërë thirrje që në zgjedhjet vendore, asnjë kryetar i deritanishëm Bashkie apo Komune, të mos rikandidohet. Sipas saj, nuk vlen asnjë gjykim për ta, të majtë a të djathtë qoftë, sipas së cilit ndonjëri dhe ka punuar mirë. Për zonjën Çavo, mjafton masakra urbane cep më cep të Shqipërisë, për t`i gjykuar të gjithë me të njëjtin standart: atë të dështimit në ushtrimin e detyrës. Ja si shprehet ajo në një shkrim për gazetën ‘Shqip’:
“Asnjë, po vërtet asnjë pushtetar i pushtetit lokal nuk duhet të rikandidohet më për këtë pushtet. Arsyet janë shumë më të qenësishme sesa justifikimet se “ky kryetar bashkie ka punuar mirë”, apo “ky kryetar komune ka fisin nga mbrapa dhe na siguron fitoren”. Ky mentalitet primitiv i politikës sonë anadollake ka prodhuar një specie të keqe të drejtuesve të pushtetit lokal; specien e një klase që ka tashmë jo vetëm sjelljen prej çifligari ndaj votuesve, por edhe një bazë ekonomike të “mirë” që e ka siguruar nga ky pushtet. Por më konkretisht: Të gjithë këta pushtetarë të komunave apo bashkive, pa asnjë dallim të majtë apo të djathtë, janë përgjegjës për kasaphanën e madhe urbane ndaj vendit. Janë përgjegjës për çka i kanë bërë territorit. Nga statistikat që vetë qeveria publikon, rezulton se nuk ka njësi të pushtetit vendor që të mos jetë cënuar nga kjo katrahurë. Ndaj qoftë edhe për këtë fakt asnjeri prej tyre nuk do duhej të rikandidohej. Nuk më duket aspak me vend që të thuhet se ky kryetar bashkie, i Durrësit, apo Korçës, Elbasanit apo Shkodrës etj., etj., kanë punuar mirë ndaj e meritojnë rikandidimin, pasi masakra urbane tregon të kundërtën”.
