Nga Saimir Sulaj, Washington
Shtypi shqiptar pas periudhës së komunizmit ishte temë e një diskutimi të frytshëm në Librarinë e Kongresit, në kryeqytetin amerikan Washington, D. C. E ftuar për të referuar në aktivitetin e organizuar nga Libraria e Kongresit dhe mbështetur nga dega e federatës “Vatra” në Washington, ishte kryeredaktorja e Agjencisë Telegrafike Shqiptare, gazetarja Flora Nikolla.
Drejtori i Divizionit të Europës në Librarinë e Kongresit, zoti Grant Harris e nisi fjalën e tij përshëndetëse me një pasqyrim të vëllimeve në shqip që ky institucion me famë botërore ka në gjuhën shqipe. “Janë mbi njëmijeshtatëqind vëllime në shqip në Librarinë e Kongresit, ku futen materiale që flasin për historinë, gjuhën, letërsinë e të tjerë. Shumë materiale janë të shkruara, por ka edhe regjistrime zanore apo edhe muzikore”, tregoi zoti Harris përpara të pranishmëve. Ai theksoi se është i lumtur që drejton një divizion të Librarisë së Kongresit, ku pjesë e tij janë edhe Shqipëria me Kosovën.
Në fjalën e saj, zonja Nikolla bëri një pasqyrim të historisë së shtypit shqiptar pas periudhës së komunizmit, me vështirësitë dhe sfidat që ka kaluar një etapa të ndryshme, siç janë edhe ngjarjet kulminante të vitit 1997 apo luftës në Kosovë.
Vëmendje të madhe pati pjesa e diskutimeve për problematikat që ka media shqiptare. Veçanërisht, theksi u vu te vonesa e pagave për gazetarët, puna e tyre në të zezë, të pasiguruar, si dhe trysnia politike dhe ekonomike, përmes rregullave të pashkruara, që pronarët dhe drejtuesit e mediave ushtrojnë ndaj gazetarëve. Duke e ndalur te media ku ajo është drejtuese, pra Agjencia Telegrafike Shqiptare, zonja Nikolla pohoi se ka një rënie të lexueshmërisë së kësaj agjencie, kjo si pasojë e konkurrencës nga mediat sociale.
“Kalimi në një faqe web e ka uluar besueshmërinë dhe lexueshmërinë e Agjencisë Telegrafike Shqiptare. Kjo agjenci, për hir të së vërtetës, vazhdon t’u qëndrojë besnike disa kritereve mbi të cilat ajo është ndërtuar në raportimin dhe shkrimin e lajmit. Kjo është një gjë pozitive pasi në të gjitha raportimet e lajmeve ne nuk kemi asnjë kontestim publik apo nga institucione të ndryshme, siç janë edhe ambasadat e huaja në Shqipëri, të cilat informohen me lajmet që ne prodhojmë. Por, ndërkohë do të thoja që forca që ka pasur Agjencia Telegrafike Shqiptare, me kalimin e viteve ka rënë. Goditja e fundit që ju dha ishte kalimi në web. Kjo do të thotë që pavarësisht rëndësisë mediatike dhe zyrtare që ajo ka, nuk ka atë besueshmërinë sepse konkurrohet në të njëjtën kohë me disa qindra apo mijëra faqe ëebi të cilat po lindin si kërpudhat mbas shiut.”, theksoi Nikolla.
Ajo bëri edhe një thirrje drejtuar qeverisë shqiptare për ta mbështetur agjencinë, në kohën kur sipas saj po konkurrohet padrejtësisht nga shumë media online, të cilat shpeshherë shkruajnë edhe lajme të rremë e të pabazuar në fakte. Në diskutim u soll edhe çështja e plagjiaturës dhe u ra dakord se me masivizimin e medias përmes internetit, kjo është kthyer në problem dhe se thuajse çdo gazetari po i ndodh që t’i vidhet puna. Gazetarja e shërbimit shqiptar të Zërit të Amerikës, Laura Konda tregoi se si ndodh shpesh që mediat shqiptare vjedhin lajmet e përgatitura nga ZA pa kërkuar asnjë lloj lejeje apo pa cituar aspak se ku është marrë lajmi.
Të pranishëm në këtë aktivitet ishin gazetarë të Zërit të Amerikës, përfaqësues të federatës “Vatra”, drejtues të Ambasadës Shqiptare në Washington, mes të cilëve edhe atashehu kulturor pranë kësaj ambasade, zoti Visar Zhiti, si dhe përfaqësues të ndryshëm të komunitetit shqiptar në zonën e Washingtonit. /tesheshi.com/
