Gazeta libaneze Al-Akhbar ka zbuluar detaje të asaj që thotë se është një plan arabo-amerikan për “ditën pas” të luftës së Gazës.
Gazeta libaneze e lartpërmendur thekson se plani arabo-amerikan synon t’i dorëzojë Rripin e Gazës Autoritetit Palestinez, ndërkohë që arrihet një marrëveshje për normalizimin e marrëdhënieve mes Arabisë Saudite dhe Izraelit. Sipas këtij plani, anëtarët e Al-Qassam do të integrohen në shërbimet e sigurisë në Rripin e Gazës, pasi brigadat të shpërbëhen. Plani përfshin gjithashtu punën për shpërbërjen e lëvizjes Hamas dhe për të siguruar që procesi i rindërtimit në Rripin e Gazës të zhvillohet pa mbikëqyrjen e lëvizjes, të cilën vendet arabe dhe Shtetet e Bashkuara duan ta integrojnë në PLO.
Amerikanët besojnë, bazuar në përvojat e tyre, nga Vietnami në Afganistan dhe Irak, se luftërat që synojnë vetëm pushtimin dhe kontrollin, pa gjetur alternativa politike dhe pa zhvilluar mënyra për të qenë të suksesshëm dhe stabilizues, do të kthehen në beteja të gjata kundër “grupeve të armatosura lokale” dhe do të përfundojë vetëm me kosto të mëdha humbjeje.
Shtetet e Bashkuara, së bashku me disa nga aleatët e saj arabë, janë të preokupuar me atë që është bërë e njohur si çështja e “ditës pas” të luftës gati 8-mujore të Izraelit në Rripin e Gazës. Që nga fillimi i luftës, Uashingtoni paralajmëroi aleatët e tij në Tel Aviv që të mos shkojnë në luftë pa objektiva dhe një plan të qartë politik pas përfundimit të operacioneve ushtarake.
Amerikanët gjithashtu i qëndrojnë ende mendimit të tyre, madje duken më të përkushtuar dhe të bindur për të, duke pasur parasysh gjithë këta muaj lufte dhe dështimin e Izraelit për të arritur ndonjë nga qëllimet e tij të deklaruara, me rritjen e kostos politike veçanërisht për presidentin amerikan Joe Biden dhe dëmin që mund t’u shkaktohet interesave amerikane në rajon nëse lufta përhapet edhe në zona të tjera, duke e ditur se mundësitë e zgjerimit po shtohen dita ditës, me ose pa vullnetin e palëve.
Në përputhje me sa më sipër, një takim zyrtar i ministrave të jashtëm me përfaqësues të “Gjashtë Arabe” (Arabia Saudite, Jordania, Egjipti, Emiratet, Katari dhe Autoriteti Palestinez) dhe Sekretarit të Shtetit Anthony Blinken u mbajt në Riad më 29 prill 2024.
Fokusi i tij ishte diskutimi për çështjen e “ditëve pas luftës” dhe përpjekja për të arritur një vizion të unifikuar për të ardhmen e rajonit. Atij takimi i kanë paraprirë disa takime dhe kontakte mes vendeve arabe, për të arritur një “vizion arab” unik që më pas do t’ua prezantonin amerikanëve. Sipas një dokumenti të siguruar nga Al-Akhbar, vizioni i rënë dakord me Blinken është i ndarë në dy faza, qëllimet e së dytës nuk do të arrihen pa arritur qëllimet e fazës së parë.
Sipas dokumentit të përmendur, faza e parë parashikon:
1) Nevoja urgjente për një armëpushim në Gaza.
2) Arritja e kushteve për njohjen ndërkombëtare të Shtetit të Palestinës.
3) Pranimi i Izraelit për kthimin e Autoritetit Palestinez në Gaza.
4) Lirimi e pengjeve dhe lirimi i të burgosurve palestinezë me ndihmën e administratës amerikane (marrëveshje shkëmbimi).
5) Formimi i një qeverie reformiste nga Autoriteti Palestinez (teknokratët), së bashku me një “komitet teknokratik” për rindërtimin e Gazës me mandat arab.
Por e gjitha kjo duket tejet e bukur për t’u bërë realitet; jo për faj të rezistencës palestineze, apo pamundësisë që ajo t’i delegojë pushtet civil Autoritetit (infantil) Palestinez pasi vetë ka bërë luftën dhe ia ka thyer turinjtë ushtrisë së konsideruar “më moderne në botë”, porse vetë Izraeli e ka kauzë të panegociueshme zhdukjen e Gazës dhe pushtimin e çdo territori të mbetur palestinez, madje çdo palestinezi. Dhe është kauzë fetare e jo politike. Fetare, në të gjithë mbrapshtinë e vet njerëzore, si rebelim ndaj Zotit, thjesht duke manipuluar Urdhëresat e Tij, nëpërmjet të cilit manipulim jetojnë e veprojnë me delirin e madhështisë dhe maninë e persekucionit. /tesheshi.com/
