Santosi brazilian, klubi i një prej futbollistëve më të mirë në botë, të ndjerit Pele, zbriti në kategorinë e dytë për herë të parë në historinë e tij 111-vjeçare.
Sezonin e keq e konfirmoi vetëm humbja ndaj Fortalezës në shtëpi në xhiron e fundit të Serisë A braziliane, raporton Reuters.
Fituesi tre herë i Copa Libertadores, Santos është një nga tre klubet, së bashku me Sao Paulo dhe Flamengo, që nuk kanë rënë kurrë nga liga e parë e Brazilit, por një seri e dobët prej pesë ndeshjesh pa fitore i ka bërë ata të zbresin aty ku nuk e imagjonin.
Epoka e artë në vitet ’50 dhe ’60
Gjatë karrierës së tij, Pele ndihmoi Santos të bëhej një nga klubet më të famshme në futbollin botëror dhe skuadra përjetoi një epokë të artë në vitet ’50 dhe ’60, kur fitoi gjashtë tituj kampion në Brazil.
Ata gjithashtu fituan Copa Libertadores, ekuivalenti i Amerikës së Jugut të Ligës së Kampionëve, në 1962 dhe 1963. Atë vit fituan edhe Kupën Ndërkontinentale, trofe për të cilin garuan skuadrat më të mira nga Evropa dhe Amerika e Jugut.
Përveç Pele, Santos ka prodhuar një mori lojtarësh të shquar si ish-sulmuesi i Milanit, Robinho, golashënuesi më i mirë i Brazilit, Neymar dhe sulmuesi i Real Madridit, Rodrygo. /tesheshi.com/
