Një raport i grupit izraelit Thyerja e Heshtjes (Breaking the Silence), i publikuar ditën e djeshme, tregon se si ushtarëve izraelitë u qe thënë në operacionin e vitit të kaluar në Gaza të qëllonin mbi këdo që u dilte përpara, qoftë civil apo jo.
Raporti përshkruan shkatërrimin që lanë pas izraelitët gjatë pushtimit të Gazës në korrikun e 2014-s. Grupi harxhoi më tepër se tetë muaj që prej mbarimit të luftës me mbledhjen e dëshmive të më shumë se 60 pjesëtarëve të ushtrisë izraelite, përfshirë ushtarë dhe oficerë.
“Ne po hapnim zjarr kuturu gjatë gjithë ditës. Hamasi nuk shihej askund,” citohet të ketë thënë një rreshter.
“Ideja ishte se nëse pikasni dikë, qëllojeni,” vijon një dëshmitar tjetër.
Raporti i të hënës linte të kuptohej se Forcat Izraelite të Mbrojtjes e minimizuan rrezikun për trupat e tyre duke i dëmtuar civilët.
Grupi u shpreh se zbulimet e tij hedhin dyshime mbi etikën e Forcave Izraelite të Mbrojtjes.
Dëshmitë i kundërshtojnë pretendimet e ushtrisë izraelite se ajo u kujdes t’i shmangte viktimat civile dhe se infranstruktura e Gazës nuk u bë objektiv kur nuk ishte e nevojshme.
Sipas raportit, parimi udhëheqës ushtarak, “rrezik minimal për forcat tona, edhe me çmimin e dëmtimit të civilëve të pafajshëm,” çoi në dëmtim të paparë dhe masiv të popullatës e të infrastrukturës në Rripin e Gazës.
Sipas shifrave të OKB-së, gjatë konfliktit në muajt korrik e gusht të vitit të shkuar u vranë 2.256 palestinezë, 1.563 prej të cilëve ishin civilë.
Grupi Thyerja e Heshtjes, i cili punoi për mbledhjen e dëshmive të më tepër se 60 veteranëve të luftës, bëri thirrje për një hetim të jashtëm, “që mund të marrë në shqyrtim sjelljen në rangjet më të larta të institucioneve politike dhe të sigurisë”. /tesheshi.com/
