Deputeti i Parlamentit shqiptar. Tom Doshi, i cili ndiqet penalisht për një dëshmi të rreme për një komplot vrasjeje ndaj tij, tashmë është i akuzuar zyrtarisht edhe për fshehjen e një pasurie prej 23 milionë eurove.
Tom Doshi, deputeti më i pasur i Parlamentit shqiptar, ka qenë një sipërmarrës në fushën e prodhimit e tregëtimit të barnave, si dhe në industrinë ushqimore.
Inspektorati i Lartë i Deklarimit e Kontrollit të Pasurive ka dorëzuar në Prokurorinë e Përgjithshme kallëzimin penal për deputetin Tom Doshi, i cili akuzohet për fshehje dhe deklarim të rremë të pasurisë.
Bëhet fjalë për një shumë, që sipas Inspektoriatit të Lartë të Deklarimit dhe Kontrollit të Pasurisë, shkon deri në 23 milionë euro. Shkeljet, sipas ILDKP-së, janë kryer nga viti 2005 deri në vitin 2014.
“Nga kontrolli për këtë periudhë rezultuan fshehje të pasurive, deklarime të rreme, për pasuritë në shumën rreth 14.000.000 euro, kontrata fiktive pasurish, transferta bankare të dyshimta e pa burime të ligjshme financiare, si dhe dyshime për pastrim parash, brenda dhe jashtë vendit, në shumën rreth 9.000.000 euro”, thuhet në kallëzimin ILKDPI-së.
ILDKPI ka qenë ndër vite në dijeni të këtyre shumave, por asnjëherë nuk i ka bërë publike.
“ILDKPKI bën me dije se deputeti Doshi është kontrolluar nga viti 2005 deri më 2013-n disa herë, por, edhe pse në kontrollet e kaluara inspektorët e çështjes kanë evidentuar shkelje të ligjeve dhe konflikte interesi dhe kanë propozuar zgjidhjet sipas ligjit, drejtuesit e ILDKPKI-së i kanë mbajtur ato të fshehura, pa i dërguar dosjet në Prokurori, ashtu siç përcaktohet në ligjet bazë”, vijon njoftimi.
Inspektoriati ka dërguar kallëzimin penal në Prokurorinë e Përgjithshme, ku kërkon që hetimet paraprake të kryera prej tij të shtrihen më tej “për të zbuluar nëse ka shkelje të tjera”.
Aktualisht ndaj deputeti Tom Doshi është vendosur masa “detyrim paraqitjeje” prej Gjykatës së Lartë, pas procesit gjyqësor të ngritur ndaj tij me akuzat e “kallëzimt dhe dëshmisë së rreme e kanosjes”.
