Pak ditë më parë do zbulohej mozaiku në ballë të Muzeut Kombëtar, i restauruar, financuar nga BE. Eshtë prej atyre muraleve simbol të regjimit komunist.
Një nga autorët e njëherësh një nga restuauruesit, Anastas Kostandini, ka treguar një të pathënë deri më sot lidhur me qëndrimin e Enver Hoxhës për këtë vepër, faktin që ai nuk ka pranuar të jetë brenda saj.
“Miratimi i mozaikut është bërë në nivelin më të lartë, i është paraqitur edhe vetë Enver Hoxhës. Një tentativë që patëm gjatë kohës që e konceptonim, për ta futur figurën e tij në kompozim, ai e ka refuzuar dhe ka thënë që populli është ai që është fitimtari dhe protagonisti kryesor i historisë tonë. U la të kuptohej që nuk do të kishte asnjë figurë tjetër”, tha ai.
Në një qasje artistike, Kostandini refuzon ta quajë atë si një vepër vetëm me peshë ideologjike e politike.
“Nuk është një vepër krejt ideologjike dhe politike. Brenda saj shoh poezinë e epokës, shoh veten tonë. Në mënyrën si është ndërtuar ka humanitet. Një imazhi i tillë i bën nder Shqipërisë. Ka kapërcyer kufizimet ideologjike. Nuk është gjë tjetër veçse një poemë e madhe me ngjyra lavdërimi për kombin dhe për historinë…”, është arsyetimi i tij. /tesheshi.com/
