Kryeministrja Theresa May njoftoi zyrtarisht se të mërkurën e javës së ardhshme Britania e Madhe aktivizon nenin 50 për daljen nga Bashkimi Evropian. Nga numri 10 i Downing Street ajo tha se do t’i shkruajë një letër 27 vendeve anëtare të BE-së për hapjen e bisedimeve për dalje, duke shtuar se pritet që negociatat të fillojnë sa më shpejt të jetë e mundur.
Ky veprim vjen nëntë muaj pas referendumit britanik ku u votua 51.9% me 48.1% për të dalë nga BE-ja.
Bisedimet mbi kushtet e nisjes dhe marrëdhëniet e ardhshme të Britanisë me BE-në kushtëzohen pikërisht nga neni 50. Nëse gjithçka shkon sipas parashikimeve, Brexit duhet të ndodhë në mars të 2019.
Zyrtarët britanikë njoftojnë se pas aktivizimit të nenit 50, pritet që 27 shtetet anëtare të BE-së të bien dakord, dhe do të ketë një përgjigje fillestare brenda 48 orëve.
Një zëdhënës britanik tha se qeveria kërkon që bisedimet të fillojnë sa më shpejt që të jetë e mundur, por ka shtuar se “e vlerësojmë plotësisht të drejtë që vendet e BE-së të kenë kohën e mjaftueshme për të rënë dakord për pozicionin e tyre”.
May tha vitin e kaluar se ajo ka për qëllim që të realizojë largimin e plotë të Britanisë së Madhe nga BE-ja në fund të marsit 2018. Udhëheqësit e BE-së kanë deklaruar ndërkohë se duan të arrijnë në përfundimin e bisedimeve brenda 18 muajve.
