Është trashur shumë çështja e koklavitur dhe e debatuar e CEZ.
Kontrolli i Lartë i Shtetit ka paditur penalisht në Prokurori për shpërdorim detyre ministrin e Energjisë dhe Industrisë, Damian Gjiknuri dhe Avokaten e Shtetit, Alma Hiçka, me akuzën se me marrëveshjen për të zgjidhur pa gjyq konfliktin CEZ me shtetin shqiptar, i kanë shkaktuar një dëm të madh shtetit.
Në shkresën që KLSH i ka dërguar tesheshi.com nëpërmjet postës elektronike, theksohet se
“Referuar përmbajtjes së Marrëveshjes për Zgjidhjen me Mirëkuptim, të nënshkruar më datë 23.06.2014, nga Grupi i Punës i kryesuar nga Ministri Gjiknuri, evidentohen fare qartë elementët e një marrëveshjeje tërësisht të pabarabartë dhe jo në proporcion me pretendimet e deriatëhershme të Shtetit Shqiptar ndaj CEZ a.s, duke shkaktuar një dëm ekonomik në shumën 479 milionë euro”.
Dëmin e shkaktuar KLSH e ndan në tre pjesë; Së pari 95 milionë euro, që ishte shuma e dakortësuar që pala shqiptare derdhi për llogari të CEZ sh.a. si pjesë e ujdisë për zgjidhjen me mirëkuptim të mosmarrëveshjeve.
Së dyti, 352 milionë euro dëm i shkaktuar nga detyrime financiare që CEZ sh.a. kishte ndaj shtetit shqiptar si pasojë e keqmenaxhimit 2009-2012, e që me anë të kësaj marrëveshjeje iu falën.
Së treti, 32 milionë euro zhvlerësimi i vlerës së 24 përqind të aksioneve të shtetit në kompaninë e shpërndarjes së energjisë elektrike.
Së bashku me ministrin Gjiknuri, është kallëzuar penalisht edhe Avokati që përfaqësonte interesat e shtetit shqiptar. /tesheshi.com/
