Për herë të parë, një familjare e Berishës, më saktë e bija Argita, është ngjitur në një podium politik, duke dhënë mesazhin e një trashëgimtareje të mundshme politike e të atit të zgrip të moshës, gjithsesi ende aktiv pa energji të rëna. Pra, hera e parë kjo një politikën shqiptare ku një lider përfshin familjen e tij në politikën aktive.
Në një fjalim në Kuvendin e Rithemelimit, Argita potencoi faktin se dhe ajo ka qenë ish-dhjetoriste, duke e nisur pikërisht prej aty legjitimitetin për të qenë sot një pretedente për pushtet, si i ati, ndërkohë që dhe ajo mban vulën “non grata” nga SHBA dhe Britania.
“Ajo që nuk mund të pranoja dhe që më bënte absolutisht të vendosur në qëndresën time ishte mohimi i lirive politike, e drejta e fjalës, e drejta e mendimit ndryshe, e zgjedhjes së mënyrës së jetesës, e shkollimit, e drejta e besimit. Ne e refuzuam këtë sepse donim të jetonim si njerëz të lirë, me dinjitet. Ne hymë në grevë urie për heqjen e emrit të Enver Hoxhes nga UT, si një provë force ndaj rregjimit dhe fituam.
Ne pra, ishim brezi që ditëm të qëndronim dhe fituam ndaj diktaturës më të egër të lindjes. Fituam sepse guxuam, sepse qëndruam, sepse u bëmë bashkë. Pyes përsëri veten, çfarë n’a ndodhi? Në cilën pikë të rrugëtimit tonë gabuam që erdhëm në këtë gjendje. Pse nuk qemë të aftë të krijojmë një shtëpi, një të ardhme të sigurt për fëmijët tanë në këtë vend?!
Ndoshta sepse në një moment, ne i thamë vetes se misioni ynë u krye, se rruga jonë e ngushtë e profesionit, apo puna e secilit, qe më e rëndësishme dhe e pavarur nga rruga e gjerë, e përbashkët e të gjithëve. Se nuk kemi mundësi, kohë apo se nuk ia vlen të ngresh zërin për çdo gjë, se nuk ia vlen të kundërshtosh një të keqe që nuk të prek direkt në një moment. Por e keqja forcohet nga indiferenca jonë dhe ajo u bë gjithnjë e më imponuese”, tha ajo, e cila ndryshe nga i ati solli një citim politik.
“Gritschneder thotë se ‘popujt qe flenë ne demokraci, rrezikojnë të zgjohen në diktaturë’. Ne harruam se çfarë kishim qenë të aftë të bënim ne, brezi që rrëzoi një diktaturë dhe që ngriti nga hiçi një ekonomi tregu. Ne kemi ditur të ngrihemi dhe të luftojmë, por lejuam të keqen që erdhi nga kreu, të shtrihej e kapilarizohej në shoqëri dhe sot e gjejmë veten të ngërthyer prej saj”, tha e bija e Berishës, së cilës së fundi iu arrestua i shoqi nga SPAK, gjë e cila ka ndikuar në këtë aktivizim politik si dhe në shtimin e egërshanisë politike nga i ati.
Siç ky i fundit, edhe ajo bëri thirrje për të përsëritur ‘90-ën. “Unë e di se me ndihmën e Zotit nuk ka qëllim që njeriu nuk mund t’a arrijë, nuk ka të keqe që ne nuk e mundim dot. Ndaj le të ngrihemi edhe një herë për shtëpinë dhe të ardhmen e fëmijëve tanë”. /tesheshi.com/
