Sali Berisha do shijojë daljen nga shtëpia pas 11 muajsh. Kjo pasi gjykata ka vendosur t’i heqë atij masën “arrest shtëpie”, kërkuar nga SPAK, duke u vënë nën akuzë për dosjen “Partizani”.
Lajmin e bëri me dije avokati i tij, Genc Gjokutaj, sipas së cilit, SPAK i “ka hipur kalit së prapthi”.
“Mbi bazën e kërkesës sonë, gjykata revokoi masën e ‘arrestit të shtëpisë’ si një masë që nuk ka as kritere as kushte për caktimin e saj. Nga sot, Sali Berisha është i lirë dhe pa asnjë masë sigurimi ndaj tij.
Gjykata konstatoi që për zotin Berisha nuk egzistojnë më kushtet dhe kriteret për caktimin e asnjë lloj mase sigurie, por sigurisht prokuroria kërkoi mbajtjen në arrest shtëpie.
SPAK të bëjë çfarë të dojë por duhet të ul kokën dhe të shikojë se çfarë ka bërë, të kthehet ne retrospektivë sepse i ka hipur një kali për së prapthi”, tha Gjokutaj.
E megjithatë, Berisha, sfidues i njohur dhe i rregullt i ligjit, kur ai nuk përputhet me interesat e tij politike, nuk ndenji në “arrest shtëpie” sipas ligjit. Edhe pse nuk doli prej saj, nga dritarja kryente çdo natë aksione verbale politike. /tesheshi.com/
