Përfaqësuesi i Serbisë në Kombet e Bashkuara, Milan Milanovicc, i ka dërguar një letër Presidentes së Këshillit të Sigurimit të OKB-së, Dina Kawar, më 8 prill, lidhur me deklaratën e kryeministrit Edi Rama, se shqiptarët mund të bashkohen në një shtet.
Serbia i ka cilësuar si provokim dhe rrezikim i marrëdhënieve mes Serbisë dhe Shqipërisë.
“Shkëlqësi, jam i obliguar të tërheq vëmendjen tuaj në deklaratën e bërë nga z. Edi Rama, Kryeministër i Republikës së Shqipërisë, dhënë në një intervistë të përbashkët me z. Hashim Thaçi, në një televizion në Prishtinë, të hënën, me 6 prill 2015”.
“Në intervistë, z. Rama ka deklaruar se ‘Shqipëria dhe Kosova do të bashkohen në mënyrë klasike’ nëse Bashkimi Europian nuk e hap rrugën për integrimin e Kosovës dhe liberalizimin e vizave. Deklarata është provokative dhe jashtëzakonisht problematike për marrëdhëniet në rajon, në veçanti për ato mes Serbisë dhe Shqipërisë, dhe paraqet një kërcënim serioz për paqen dhe stabilitetin rajon”, thuhet në letër.
“Në injorim të plotë ndaj Rezolutës 1244 (1999) të Këshillit të Sigurimit dhe e barabartë me një thirrje për ri-vizatimin e kufijve ndërkombëtarë, deklarata shkon në kundërshtim me shpirtin e bashkëpunimit, mirëkuptimit të përbashkët, fqinjësisë së mirë dhe të ardhmes së përbashkët për shtetet e rajonit dhe përpjekjet e tyre për t’ju bashkuar Bashkimit Europian”, thuhet më tej aty.
“Duke tërhequr vëmendjen tuaj në këtë deklaratë, do të doja të theksoj se Republika e Serbisë në mënyrë konsistente ka mbështetur vlerat dhe parimet e sipërpërmendura, të mishëruara në Kartën e Kombeve të Bashkuara dhe të dhëna edhe në standardet europiane, dhe pret që ato të respektohen plotësisht edhe nga vendet tjera të rajonit gjithashtu. Vendi im pret që bashkësia ndërkombëtare të dënojë retorikën nacionaliste që pengon procesin e pajtimit dhe progresit në rajon”, thuhet në letër.
Pas pranimit të kësaj letre, Këshilli i Sigurimit të OKB’së do të vendosë nëse kjo çështje do të debatohet ose jo.
