Personi më i kërkuar sot në Kosovë, deputeti i Partisë Demokratike të Kosovës (PDK), Azem Syla më në fund është bërë i “gjallë”.
Ai ka thënë se me shqetësim të thellë e ka marrë lajmin sot për bastisje dhe se nuk ka pasur asnjë fletëthirrje nga organet shtetërore, duke mos qenë në dijeni se është duke u zhvilluar ndonjë hetim ndaj tij.
Syla më tej ka thënë se ka qenë në kontakt me personat që kanë bastisur shtëpinë e tij, duke shprehur gatishmërinë për t’u kthyer në Kosovë edhe pse nuk tregon se kur do të ndodh një gjë e tillë.
Ai thotë se është plotësisht i pastër.
Reagimi i plotë i Azem Sylës:
Me shqetësim të thellë kam marrë lajmin sot, për bastisjen e shtëpisë sime në orët e hershme të mëngjesit, nga policia e Eulexit dhe policia e Kosovës.– Njoftoj opinionin e gjerë se unë deri ditën e djeshme kam qenë në Republikën e Kosovës, duke kryer te gjitha aktivitetet e mia publike si deputet i Parlamentit të Republikës së Kosovës.– Unë nuk kam pasur asnjë fletëthirrje nga organet shtetërore dhe nuk kam qenë në dijeni se ka qenë duke u zhvilluar ndonjë hetim ndaj meje.– Prandaj unë qysh dje pasdite kam lëvizur jashtë vendit me një agjendë time personale.– Vlen të theksohet se sot gjatë bastisjes së shtëpisë sime, unë kam qenë në kontakt përmes telefonit me organet kompetente që kanë marrë pjesë në bastisje, dhe kam shprehur gatishmërinë time për t’u kthyer në Kosovë dhe për të bashkëpunuar me organet e drejtësisë, në çdo kohë kur ata e shohin të nevojshme.– Unë Azem Syla dua t’i garantoj familjarët e mi, miqtë, bashkëluftëtarët dhe të gjithë qytetaret e Republikës së Kosovës, se asnjë nga pretendimet e ngritura ndaj meje, nuk qëndrojnë, janë të pavërteta, tendencioze dhe qëllimkëqija. Unë absolutisht jam i pastër, dhe kjo pastërti do të dëshmohet shumë shpejt nga organet e drejtësisë.– Një jetë të tërë ja kam kushtuar krijimit dhe ndërtimit të shtetit të Republikës së Kosovës, prandaj jam i prirë fuqishëm të besoj në organet e drejtësisë së vendit tim. Me respekt!Azem Syla
