Pikërisht kur SHBA-të kërcënojnë me sanksione të reja ndaj Iranit, zëvendëskomandanti i Rojeve Revolucionare, gjenerali Husein Selami ka deklaruar se forcat që ai drejton kanë aq shumë raketa sa nuk dinë ku t’i fshehin.
“Na mungon hapësira e nevojshme në stoqet për t’u bërë vend raketave tona,” është shprehur ai.
“Qindra tunele të gjata janë plot me raketa gati për të fluturuar për të mbrojtur integritetin, pavarësinë dhe lirinë tuaj,” i ka thënë sot gjenerali në Teheran një grumbulli adhuruesish në faljen e së premtes.
Presidenti iranian, Hasan Ruhani, po ashtu i ka quajtur “ndërhyrje armiqësore dhe ilegale”, që meritojnë një përgjigje, planet amerikane për vënien në listën e zezë të individëve dhe kompanive që kanë lidhje me programin raketor iranian.
Ruhani i ka urdhëruar forcat ushtarake ta intensifikojnë zhvillimin e raketave dhe të ndërmarrin çdo hap të nevojshëm për të nisur programe të reja nëse do t’i shërbenin më mirë mbrojtjes së Iranit.
Dy teste raketore janë kryer nga Irani në pesë muaj prej arritjes së marrëveshjes bërthamore, çka i ka nervozuar së tepërmi SHBA-të. Këto dy teste raketore janë në shkelje të rezolutave të mëhershme, ka deklaruar një panel i OKB-së muajin e shkuar. /tesheshi.com/
