Lideri i opozitës, Lulzim Basha ka akuzuar mazhorancën se po përdor njerëz me lidhje kriminale për të bërë presion në disa zona si në Vorë, Durrës dhe Tiranë. Duke folur në emisionin Top Story të gazetarit Sokol Balla, Basha deklaroi se oferta që po paraqet PD në fushatë është një rrugëzgjidhje imediate për vendin, që sipas tij po vuan një situatë të rëndë ekonomike dhe zhytje në varfëri…
Sokol Balla: Ne si gazetarë, shikojmë që ritmet e fushatës nuk janë ato agresive, të ashpra. Duket se është me zbehtë se herët e tjera dhe kjo ndoshta edhe për shkak se stili juaj i fushatës është pak më ndryshe nga ai i kryetarit të mëparshëm, apo është thjeshtë fakti që Berisha mungon në këtë fushatë?
Lulzim Basha, kryetar i PD: Nuk ka dyshim që stili im është stili im dhe i askujt tjetër, por nuk do të thoja që fushata ka ritëm më të ulët apo të zbehtë. Fushata ka nisur shumë më përpara se 4 javët që ju përmendet dhe që në ditët e para ne kemi vënë re një padurim të njerëzve për ditën e votimit. E kam prekur këtë padurim në turin e parë të prezantimit të kandidatëve, në takime të rastësishme të cilat ishin konceptuar si të tilla, por shndërroheshin në mitingje nga pjesëmarrja dhe entuziazmi i njerëzve, nga dëshira e tyre për të pasur sa më shpejt mundësinë për t’u shprehur me votë. Është një padurim popullor për 21 Qershorin, që ka nisur 6-7 javë më parë dhe vazhdon edhe këto ditë. Ka një fushatë entuziaste, me padurim të njerëzve për të ushtruar të drejtën e tyre për të vlerësuar me votë oferta, qeverisjen dhe për të zgjidhur problemet e ngutshme të shqiptarëve.
Sokol Balla: Si e shpjegoni që edhe nga përfaqësues të BE-së është shprehur shqetësimi se ka një shkallë të madhe mospërgjigjie dhe mosreagimi të njerëzve në sondazhe? Këtu ka një kontradiktë.
Lulzim Basha: Do ta ndaja këtë në dy pjesë, e para është realiteti që flet vetë dhe që unë e shoh në çdo takim që kam. Ka një padurim, një interes të madh të njerëzve. E kam thënë dhe kam bindjen që ka një përpjekje nga ana e qeverisë për ta mpirë këtë padurim, për ta lodhur dhe pse jo për ta shantazhuar dhe diversuar këtë padurim sepse domosdoshmërisht padurimi i njerëzve për të votuar nuk është një shenjë e mirë për qeverisjen. Sondazhet janë diçka tjetër. E kam dëgjuar vlerësimin që ju thoni. Për herë të parë në Shqipëri, shkalla e refuzimit të përgjigjieve ka shkuar në 47 përqind. Për mendimin tim kjo ka të bëjë me një faktor, që është një riprezantim i diçkaje që ne kishim lënë prapa, i përpjekjes për të intimiduar votuesin si pasojë e përpjekjes dhe retorikës së qeverisë. Ju e shikoni që kryeministri për 6 javë, 4 herë në ditë e ka pjesë të fjalorit të tij politik, kërcënimin që nëse do të votoni kandidatët e opozitës nuk do të keni ujë, tokën, pothuajse edhe ajrin e diellin. Nga ana tjetër kemi denoncime me fakte të presionit ndaj administratës të cilët kanë njerëz të punësuar në shtet, presione ndaj biznesit, presione të tipit kriminal. Kemi parë përfshirje të elementit kriminal në Durrës fillimisht, në Vorë së fundmi, me njerëz që shëtisin natën me makina me xhama të zinj. Ka një angazhim masiv, të drejtpërdrejtë të qeverisë. Meta dhe Rama kanë 60 ditë që nuk janë në detyrë. E kanë braktisur detyrën. Janë ditë për ditë në fushatë.
Sokol Balla: Edhe ju e keni këtë problem për momentin, edhe nja dy javë…
Lulzim Basha: Unë e kam zgjidhur këtë problem sepse unë nuk kandidoj, pikërisht për zgjidhur këtë dilemë që është etike, sepse qytetarët e Tiranës kanë nevojë për një kryetar bashkie me kohë të plotë që t’u zgjidhë hallet dhe opozita ka nevojë për një drejtues me kohë të plotë. Zotërinjtë janë votuar para 2 vitesh për pushtetin qendror dhe në këto 2 muaj gjithë kohën e tyre ja kanë kushtuar diçkaje që nuk ka lidhje, në dukje. Ata i shqetëson shumë padurimi i njerëzve për t’u shprehur me votë, sepse gjendja në vend është në përkeqësim e sipër. Ekonomia, varfëria, mjerimi dhe të gjitha këto jo se i thotë kryetari i opozitës, por sepse i thotë INSTAT, Banka Botërore dhe BE. Kemi të bëjmë me një situatë të pashembullt dhe ndonëse jemi në një situatë zgjedhjesh lokale, njerëzit meritojnë dhe duan të dalin nga kjo gjendje, ofertë që PD e ka dhe po e shpalos çdo ditë.
Sokol Balla: Ju folët për Vorën, por në fakt edhe ju keni qenë së paku 6 herë në Vorë, nuk është se ka qenë vetëm zoti Meta, jeni edhe ju aty. Përse kjo betejë për Vorën?
Lulzim Basha: Unë nuk kisha imagjinuar kurrë të isha as më shumë se 3 herë në Vorë, por 3 herë jam detyruar të shkoj sepse aktivistët e kandidatit tonë shoqëroheshin çdo natë në polici pa asnjë arsye, pa asnjë argument. Kam qenë në Vorë sepse kandidatit tonë iu bë një padrejtësi e madhe tipik oligarkik, o biznesin, o mandatin!
Sokol Balla: Zoti Meta e ka sqaruar këtë…
Lulzim Basha: Jo nuk ka sqaruar asgjë. E gjitha është gënjeshtër!
Sokol Balla: Ka thënë që gjithçka ka nisur pas një sinjalizimi të shërbimeve sekrete.
Lulzim Basha: Nuk është e vërtetë aspak! Në dijeninë time kemi të bëjmë me një falsifikim të analizave laboratorike që tregon që pas kësaj ka pasur një presion të jashtëzakonshëm nga zoti Meta. Ai tregon që ka me merak Vorën, por po ta kishte me merak le të kandidonte vetë në Vorë, përndryshe le të lërë zgjedhësit. Së fundi është problemi tjetër, është organizimi i bandave që patrullojnë Vorën natën për të intimiduar dhe frikësuar qytetarët. Nuk e kanë në dorë e nuk do ta kenë kurrë në dorë këta njerëz. Unë jam i bindur që për çdo përpjekje për të kërcënuar zgjedhësit do të marrë përgjigjen e merituar më 21 qershor.
Sokol Balla: Të gjithë deputetë kanë shkuar në zonat e tyre, bie fjala Sali Berisha, deputet i Tiranës përse nuk përfshihet në fushatë?
Lulzim Basha: Sali Berisha ka vendin e vet. Ka qenë në hapjen e fushatës, është ish-president, ish-kryeministër, ish-kryetar i partisë, çdo të enjte ka hapësirën e tij në Kuvend, shfrytëzon hapësirën e tij mediatike, hapësirën në rrjetet sociale dhe bën detyrën e tij si një personalitet i PD-së në këto dy dekada. Pastaj kjo puna, pse është, pse s’është është bërë si ajo puna çfarë uji i keni dhënë gomarit? Kur është pse është kaq shumë? Kur s’është, pse nuk është? Mendoj që Berisha është i kalibruar në qëndrimet e tij siç i takojnë një ish-presidenti, një ish-kryeministri dhe lideri historik i së djathtës.
Sokol Balla: Pra ka qenë një zgjedhje për të cilën keni rënë dakort të gjithë?
Lulzim Basha: Nuk ka lindur kurrë nevoja për të diskutuar dhe të biem dakort për çështje të tilla.
Sokol Balla: Të flasim pak për Tiranën. Përse u zgjodh Halim Kosova dhe jo dikush tjetër?
Lulzim Basha: Së pari për shkak të mbështetjes së madhe qytetare që na rezultonte në studimet e opinionit që PD kreu për disa bashki të vendit. Shifrat janë shifra dhe kokëforte. Arsyet se përse njerëzit në masë zgjidhnin Halim Kosovën mes kandidaturave që ne propozonim, besoj arsyet janë të qarta. Një njeri i ndershëm, punëtor, shumë punë dhe pak fjalë, i përkushtuar dhe mbi të gjitha i vërtetë. Integriteti i tij është sprovuar dhe është përtej çdo kontestimi politik. I propozuar për president nga Edi Rama.
Sokol Balla: Përse s’e pranuat për president?
Lulzim Basha: Është çështje tjetër kjo. Unë nuk kam qenë pjesë e këtij diskutimi.
Sokol Balla: Po të kishit qenë ju, do ta kishit pranuar?
Lulzim Basha: Thërrisni zotin Berisha dhe zotin Rama dhe pyetini, se unë nuk kam qenë pjesë e diskutimeve.
Sokol Balla: Do ta kishit pranuar nëse do të ishit pjesë?
Lulzim Basha: Po ç’rëndësi ka. Unë kam qenë ministër i Jashtëm dhe kam qenë në dy aktivitete të njëpasnjëshme për integrimin në NATO. Atë ditë kur është diskutuar kjo çështje kam qenë në Samitin e Dubrovnikut ku u mor një vendim shumë i rëndësishëm që hapi rrugën për ftesën në NATO. Mos më pyet për diçka që unë nuk kam qenë pjesë. Këtu qëndron fakti që zoti Rama e ka propozuar për President të Republikës. Është propozim i tij. Po zoti Rama e vlerësoi si personalitet i vitit, ish-kryeministri socialist e ka vlerësuar publikisht. Pra njerëz, të cilët nuk mund t’i akuzosh për subjektivitet pro-PD, kanë vlerësuar Halim Kosovën.
Sokol Balla: Pse duket sikur e keni lënë vetëm në fushatë? Apo është zgjedhje e tij që të mos dalë me ju?
Lulzim Basha: E thua këtë sepse personaliteti i tij rrezaton të tjerët. Në krah ka deputetët e PD-së së zonave. Unë kam dalë, kam bërë prezantimin, kam qenë në disa aktivitete me Halim Kosovën, si çdo ditë që Halim Kosovën është me qytetarët, do të shihni që pranë tij janë personalitete të PD.
Sokol Balla: Thjeshtë më kujtohet 2011, kur ju bëtë nëj fushatë pa praninë e kryetarit…
Lulzim Basha: Edhe këtu ka një problem. Kryetari ishte kryeministër. Dhe ka diçka që kryetari i partisë mbulon gjithë Shqipërinë dhe tani me 61 bashki është një axhendë e ngarkuar, kur është edhe kryeministër, nëse e bën detyrën e kryeministrit, sepse mesa duket Rama është part time kryeministër, ka zgjedhur të jetë full time fushatist dhe për herë të parë po të shikosh, është futur në spotin e kandidatit. Kjo tregon një pasiguri të madhe të PS te kandidati që kanë zgjedhur për Tiranën. Nuk është kjo! Halim Kosova udhëheq fushatën e Tiranës dhe rrezaton fushatën kombëtare me platformën, qëndrimet, me vizionin dhe me aftësitë e tij menaxheriale, politike dhe vlerat qytetare.
Sokol Balla: Përse nuk rikandiduat në Tiranë? Apo nëse bëtë gabim që kandiduat në 2011?
Lulzim Basha: Nuk kam bërë asnjë gabim që kandidova në 2011. Kisha dhe kam një vizion për Tiranën, kisha dhe tregova një vullnet për Tiranën. Por në 2011, e thashë edhe tani, Tirana ka nevojë për një kryetar me kohë të plotë. Rrethanat e sollën që në mes të mandatit të gjendesha në pozicionin e kreut të PD-së, si zoti Rama në atë kohë, por ndryshe nga zoti Rama unë bëra një zgjedhje, t’i qëndroj fjalës time. Tirana ka nevojë për një kryetar me kohë të plotë.
Sokol Balla: Pse nuk e bëtë në 2013, të jepnit dorëheqjen nga kryetar i bashkisë?
Lulzim Basha: Besoja se me ish-kryebashkiakun 11-vjeçar të Tiranës, kryetari i bashkisë në detyrë nuk do të gjendej në lufën e paprinciptë që u ushtrua ndaj kryetarit të bashkisë së Tiranës me ardhjen e Edi Ramës kryeministër. Nuk ma merrte mendja që Edi Rama do të bllokonte bulevardin e ri dhe kantierin e lumit të Tiranës. Nuk bëhej fjalë për një projekt të Lulzim Bashës, për bahçen e Lulzim Bashës, bëhej fjalë për 2 mijë vende pune, për një vizion zhvillimi që do të hapte dhe do të hapë në të ardhmen vende pune. Bëhet fjalë për 250 mijë m/katror gjelbërim, më shumë se 8 herë se Parku Rinia. Pse duhet të bllokohet kjo?
Sokol Balla: Me buxhet keni punuar dhe të mos harrojmë që zoti Rama nga 2008-a e këtej ka punuar pa buxhet…
Lulzim Basha: Nuk është ashtu, Lulzim Basha ka marrë në 2013-të më pak grant nga qeveria sesa ka marrë Edi Rama nga qeveria Berisha në 2010 dhe 2011. Nuk ka pasur një marrëdhënie të tillë armiqësore.
Lulzim Basha: Nuk është ashtu, Lulzim Basha ka marrë në 2013-të më pak grant nga qeveria sesa ka marrë Edi Rama nga qeveria Berisha në 2010 dhe 2011. Nuk ka pasur një marrëdhënie të tillë armiqësore.
Sokol Balla: Për të njëjtën gjë po akuzoheni edhe ju sot, që në muajt e fundit keni dhënë rreth 60 leje ndërtimi?
Lulzim Basha: Nuk kam dhënë asnjë leje sepse lejet janë bllokuar në gusht. Është një gënjeshtër. Lejet e ndërtimit janë bllokuar në gusht nga Edi Rama. Nuk ka një leje ndërtimi të jetë dhënë kundër planit urbanistik. Ky është ndryshimi. Unë bëra planin për dy vite dhe në bazë të këtij plani janë dhënë lejet e ndërtimit.
Sokol Balla: Ju thoni që çdo leje është dhënë brenda rregullave, ndërkohë që kemi një vendim gjykate kundër një leje ndërtimi kundër një ndërtimi që ka filluar në digën e liqenit, komenti juaj për këtë?
Lulzim Basha: Është fare e qartë se çfarë ka ndodhur. Komiteti i Digave, që kontrollohet nga qeveria, ka lëshuar një autorizim pa të cilin Bashkia e Tiranës kurrë nuk do të jepte leje për ndërtimin aty.
Sokol Balla: Është dhënë nga kjo qeveri?
Lulzim Basha: Sigurisht që nga kjo qeveri. Askush tjetër. Rama për atë zonë kishte një projekt që quhej “Tirana Rock”, me pallate 40-katëshe. Unë premtoi që hapësira publike nuk do të prekej dhe asnjë centimetër i hapësirës publike nuk është prekur. I pajis me leje ndërtimi, jo para se qeveria të lëshonte lejen e Komitetit të Digave, pa atë ne nuk procedonim. Kemi ndenjur dy muaj deri kur Komiteti i Digave e plotësoi siç duhej informacionin. Çfarë ndodhi? Në mënyrë fare të çuditshme, Komiteti i Digave përgënjeshtroi veten e vet, pra qeveria përgënjeshtroi veten e saj dhe u fut në proces gjyqësor. Vendimi i gjykatës është vendim, dhe ai zbatohet. Këtu ka një hile. Rama ishte atje para 2 javësh dhe foli sikur s’kishte asnjë lidhje, sikur nuk ishte ai që kishte miratuar 40-katëshet.
Sokol Balla: Mesa mbaj mend unë “Tirana Rocks kishte marrë lejen edhe të KRTRSH-së, me firmën e Berishës.
Lulzim Basha: Unë kam dalë kundër atij vendimi, kam dalë si ministër dhe si kandidat dhe e kam mbajtur fjalën time.
Sokol Balla: Njerëzit duhet të votojnë Tiranën tuaj të këtyre katër viteve, apo Tiranën që propozon Halim Kosova?
Lulzim Basha: Kjo është një pyetje që qytetarët e kuptojnë. Halim Kosova është njeri i ndershëm që nuk vuan nga sindroma e vitit zero. Ka një të djeshme, ka një të sotme, ka një të nesërme. Ai ka propozuar edhe zgjidhje të konfliktit, kur thotë le të vijë ta presë kryeministri shiritin tek bulevardi i ri, por vetëm të ndërtohet. Kjo është parësore sepse hap me mijëra vende pune, sepse u jep mundësi qytetarëve të Tiranës të shijojnë 250 mijë m/katror gjelbërim në fazën e parë dhe 1 mln metër katror në fazën e dytë buzë lumit të Tiranës. Një park tërësisht i gjelbërt në buzët e lumit të Tiranës. Kosova ka shprehur vazhdimësinë e këtij vizioni, e këtyre projekteve, por ka edhe projektet e tij. Halim Kosova ka qenë konkret me premtimet e tij, kandidati tjetër shkon dhe thotë që ka 350 probleme, do zgjidh 240 probleme. Halim Kosova është konkret, thotë që do furnizojë me ujë 24 orë banorët e Tiranës. Po si mund ta bënte Halim Kosova këtë premtim nëse Lulzim Basha nuk do kishte çuar ujë te 50 mijë familje?!
Sokol Balla: Në fakt ju njihet edhe ulja e ndotjes së qytetit, kjo për shkak se u pezulluan punimet në sheshin Skënderbej…
Lulzim Basha: Nuk u pezulluan. Sheshi u gjelbërua. Kantieri nuk është prekur për asnjë sekondë nga askush. Ashtu e la zoti Rama. Deri aty e çoi. Kishte mbyllur qendrën pa zgjidhur çështjen e trafikut.
Sokol Balla: Edhe ju s’e vazhduat ama.
Lulzim Basha: Po si mund të vazhdoja unë kur nuk kishte asnjë fond, nuk zgjidhte problemin e trafikut. Ky është problemi. Ky është vizioni. Shtrohen prioritetet në fillim. Ashtu siç ishte bllokuar trafiku kur po kryheshin punimet, ashtu do të mbetej edhe kur të përurohej sepse arteria e vetme ku do të shfrynte trafiku ishte kthyer në pedonale. U detyrova të jap një zgjidhje të shpejtë dhe më pak të kushtueshme. Nuk duhet të ketë njeriu sindromën e vitit zero, bëhet qesharak.
Sokol Balla: Këtu të dyja palët jeni njësoj. Ju anuluat planin zviceran, anuluat, planit rregullues…
Lulzim Basha: Unë nuk ka anuluar asnjë plan zviceran. Bëra një plan të përgjithshëm urban. Plani zviceran ishte një plan pjesor me kulla, ka ishte. Çështja qëndron këtu, që nëse nuk kemi sindromën e vitit zero, atëherë mund të themi që kjo është bërë mirë, por ka nevojë të bëhet më mirë, të çohet më tutje. Këta gënjyen për 300 mijë vende pune, tani hapin hile të tjera për të mbuluar hilenë e parë. Nuk ecet kështu. Nuk ndërtohet vendi mbi gënjeshtra. Puna është modeli im, jo propaganda.
Sokol Balla: Ndërkohë ju akuzojnë për të kundërtën, biles kanë përgatitur edhe një spot, por edhe akuza konkrete. Në këtë studio Erion Veliaj, në fondin e grantuar prej 16 mln euro për shkollat, ju keni përdorur vetëm 1.6 përqind.
Lulzim Basha: Kjo është një gënjeshtër që tregon sesa poshtë ka rënë retorika e kundërshtarit. Nuk ka fond 16 mln euro për Bashkinë e Tiranës. Fondi i Zhvillimit të Rajoneve i është dhënë Tiranës që në vitin 2013-të dhe lekët e tjera, nuk i ka dhënë Tiranës, i ka bërë palma në autostradë. Është një supergënjeshtër. Çfarë e shtyn kandidatin kundërshtar të Halim Kosovës të shpikë një gënjeshtër të tillë, përveç mungesës së ofertës dhe dëshpërimit? Nuk ka fond 16 mln euro. Nëse kjo është e vërtetë, Lulzim Basha jep dorëheqjen nga funksionet publike.
Sokol Balla: Ju thoni që nuk është e vërtetë, që keni përdorur të gjitha fondet për shkollat?
Lulzim Basha: Nuk ka diskutim që çdo qindarkë e qeverisë shqiptare, destinuar për Bashkinë e Tiranës, është përdorur.
Sokol Balla: Folët për trashëgiminë pozitive që po i lini kandidatit tuaj, Halim Kosovës. A ka diçka që jeni i vetëdijshëm që nuk e bëtë mirë? Ka ndonjë premtim që s’e mbajtët?
Lulzim Basha: Ka gjithmonë premtime që nuk realizohen dhe në rastin e bashkisë së drejtuar nga unë. Për tramin, realiteti është që projekti ka përfunduar. Rama tha që trami është një projekt që nuk i duhet Tiranës. A nuk ishte zoti Rama që doli me projektin e tramit në 2011, madje më akuzoi se i kisha vjedhur projektin. Atëherë i duhej trami Tiranës, tani nuk i duhet. Përse nuk i duhet? Sepse projekti ka përfunduar nga Lulzim Basha, projekti është financuar nga një grant i qeverisë franceze, projekti thotë që është një investim që ul ndotjen, shkurton kohën. Projekti është publik dhe është në faqen e bashkisë. Tani që ka përfunduar kjo punë, thotë që nuk i duhet trami Tiranës. Projekti është gati, është një nga projektet ku kalon e ardhmja e Tiranës. Përmirëson cilësinë e transportit urban.
Sokol Balla: Përse nuk e realizuat?
Lulzim Basha: Sepse bashkia e Tiranës për një projekt si trami nuk e financon dot pa pasur një garanci sovrane nga qeveria. I kërkuam garancinë sovrane, ja kërkoi edhe Hollande në Francë, e refuzoi.
Sokol Balla: Lexova që Halim Kosova do të merrte nënkryetare të bashkisë Albana Dhimitrin?
Lulzim Basha: Halim Kosova është i vërtetë në ato që thotë, pavarësisht se mund të mos më pëlqejnë mua, mund të mos i pëlqejnë Sali Berishës. Këtë rastin nuk e ka dëgjuar.
Sokol Balla: Po si mund të fusë në bashki një nënkryetare të kohës së Ramës?
Lulzim Basha: Halim Kosova është kandidat i PD, modeli i së vërtetës dhe qytetarët e Tiranës kanë nevojë për të vërtetën. Është koha të ndahemi nga propaganda, të vlerësojmë punët ashtu siç janë.
Sokol Balla: Bëni një fushatë politike, cili është argumenti juaj pse njerëzit duhet të votojnë sërish PD-në në Tiranë?
Lulzim Basha: Sepse Halimi ka një program dhe një ofertë imponuese. Është i vetmi që flet në mënyrë konkrete dhe zgjidhje konkrete. Ofron me emër projekt për projekt. Është programi nga njëra anë dhe njeriu nga ana tjetër. Oferta e tij është konkrete, e realizueshme dhe personi i besueshëm, i vërtetë dhe i aftë.
Sokol Balla: Në Tiranë konkurojnë edhe kandidatë të tjerë, dy prej tyre vijnë nga e djathta, Tafaj dhe Bojaxhi…
Lulzim Basha: Kandidaturat janë diversione të investuara nga kundërshtari ynë politik. Nuk është sekret që kandidati aktual i të majtës ishte me më pak pikë në anketat e PS. Megjithatë u këmbëngul tek ky. Pse? Sepse zoti Rama nuk e shikon si njeriun që do të ketë atë autonominë, vetëvendosjen, vizionin për Tiranën, por si njeriun që do ta kontrollojë siç kontrollohen ministrat.
Sokol Balla: Pra ju po thoni që Bojaxhi dhe Tafaj janë të sponsorizuar nga Edi Rama?
Lulzim Basha: Në funksion të kësaj ka marrë të gjitha masat e mundshme. I ka hequr Paskuqanin që është pjesë integrale e zhvillimit të qytetit, mirë Kamzën.
Sokol Balla: Ju do të preferonit që Kamza dhe Paskuqani të ishin pjesë e Tiranës?
Lulzim Basha: Mos futemi te reforma territoriale, se do preferoja një tjetër, realiste, ku pushteti të ishte më afër qytetarëve, ku të krijohen 60 pashallëqe për t’i kontrolluar kryeministri.
Sokol Balla: Duhet të kishit qenë prezent, mendoj une…
Lulzim Basha: Nuk kishim hapësirë, sepse harta rrinte në xhep, ndërsa ligj nuk ka. Kjo është një karrocë pa kalë. Çfarë kompetencash do të kenë kryetarët e bashkive, si do zgjidhet marrëdhënia. Qëllimi këtu është kontrolli politik.
Sokol Balla: Dy kandidaturat e tjera në Tiranë…
Lulzim Basha: Është në kuadrin e masave që morën, masave, presioni, një frike që duhet me patjetër. Dy kandidaturat janë të sponsorizuara nga e majta.
Sokol Balla: Ka pasur disa vendime të KQZ-së gjatë kësaj fushate. Vendime kontradiktore herë pas here me njëra tjetrën. A keni ndonjë koment për këto?
Lulzim Basha: Në tërësi ne kemi shqetësimet tona për sa i përket procesit dhe vendimmarrjes së organeve kryesore të procesit, të cilat i kemi bërë publike në kohë reale. Roli i KQZ-së dhe i Kolegjit Zgjedhor është të garantojnë zbatimin e ligjit dhe zbatimin e standardeve. Në këtë kuadër është shumë e rëndësishme të mos veprohet me dy standarde. Ne kemi kundërshtimet tona të qarta, të cilat i kemi bërë prezante. Mendoj se raporti paraprak i OSBE-ODIR-it flet qartë për këtë shqetësim, ku flitet për vendimmarrje partiake.
Sokol Balla: Çudi se zonja Glover u bë sërish fokus i sulmeve të zotit Berisha…
Lulzim Basha: Unë jam kryetari i opozitës dhe kam qëndrimet e mia institucionale në raport me të gjitha institucionet, duke përfshirë edhe misionin e ODIR-it. Zoti Berisha dhe zonja Glover kanë një histori që është shumë më e gjatë dhe për këtë mund ta pyesni kur ta keni në studio.
Sokol Balla: Dekriminalizimi, një çështje e shtyrë përpara nga PD-ja edhe në Parlament, e mbështetur edhe nga ndërkombëtarët. Por duket se edhe ju nuk i jeni shmangur qëndrimeve të ndryshme, duke iu referuar rastit të Këlcyrës dhe rastit të Mamurrasit, duket se problemi është i njëjtë, por qëndrimet janë të ndryshme.
Lulzim Basha: Jo. Ne jemi shumë konsekuent në qëndrimet tona dhe për këtë besoj se flet qartë edhe qëndrimi i SHBA-ve për qëndrimin e PD-së në rastin e Këlcyrës. Ne besojmë se shqiptarët meritojnë një elitë politike të painkriminuar. Në Kamzë është një kryetar bashkie, i cili akuzohet për një tender që nuk ka ndodhur.
Sokol Balla: Është dënuar, jo akuzohet.
Lulzim Basha: Kur të flasë apeli do të flasë drejtësia. Në këtë rast nuk ka pasur dëm ekonomik. Ai është dënuar se nuk ka ekzekutuar një tender, sepse kompania donte ta merrte me çdo kusht, por nuk kishte paguar taksat në bashki. Si ka mundësi që të arrijë gjykata një vendim të tillë? Në të njëjtën mënyrë që arriti në vendimin e djeshëm, për shkak të presionit politik. Presioni politik vjen nga Edi Rama, i cili është betuar publikisht para kamerave se Xhelal Mziun do e fusë në burg. Por kështu nuk ecet përpara. Ndërkohë, vetë arkitekti i Edi Ramës për Lungo Maren ndiqet penalisht në Belgjikë, sepse në Shqipëri është në konflikt interesi. Pra, ai ka vepruar duke e dhënë tenderin në mënyrë korruptive mikut të tij. Ky Kryeministër që ka këtë standard është turpërues për të gjithë shqiptarët. Tani të kthehemi të dekriminalizimi, i cili nuk ka të bëjë me manovrat politike, por me diçka tjetër. Dekrminilazimi ka të bëjë me personat me rekorde kriminale, të akuzuar për krime të tmerrshme. Pa pritur këta persona i shohim në listat për deputet. Këtu bëhet fjalë për diçka të paimagjinueshme. Si përfundojnë këta njerëz aty? Gratë detyrohen të japin dorëheqjen, për të cilat na ka kapur një dashuri e madhe në këtë fushatë. Por deri tani, dy gra kanë dhënë dorëheqjen që të hyjë në Parlament persona me rekorde kriminale. Ky është fakti, ndërsa të tjerat janë fjalë.
Sokol Balla: Edhe një burrë ka dhënë dorëheqjen në krahun tuaj.
Lulzim Basha: Por këtu po flasim për gratë. Unë nuk kam në grupin tim parlamentar asnjë person me rekorde kriminale. Nëse dikush vjen dhe thotë ky ka rekorde kriminale, unë menjëherë mbaj qëndrim ndaj tij, por askush nuk ka ardhur. Para qytetarëve, unë kam thënë se 3 kushte ka kontrata ime në emër të çdo qytetari shqiptar me kandidatët që unë ju sjell si kryetar i kësaj partie. Kushti i parë, jo rekorde kriminale; kushti i dytë, 24 orë në dispozicion të qytetarit; kushti i tretë, ulje të taksave.
Sokol Balla: Cilën nga këto standarde nuk plotësonte kandidati i Këlcyrës?
Lulzim Basha: Ai u shfaq në lista sepse solli dëshmi penaliteti dhe pas kësaj erdhën informacione dhe unë e thirra atë. Unë i kam kërkuar Ramës dhe Metës para zgjedhjeve të bëjmë ligjin. Ku të themi nëse keni rekorde kriminale, ju nuk mund të kandidoni. Por çfarë janë rekordet kriminale? Për PD-në po të dolën shenjat e gishtërinjve në çdo shtet të Europës, ti zotëri je arrestuar apo ndjekur, apo dënuar , për prostitucion, për drogë, vrasje, apo rrëmbime, ti nuk mund të kandidosh. Por ata thanë jo, se shkelen të drejtat kushtetuese. Pse ky qenka halli? Nuk mund të shkelen të drejtat e këtyre që janë të dënuar apo që dyshohen.
Sokol Balla: Pra, edhe që dyshohen…
Lulzim Basha: Po, se qytetarët nuk e meritojnë këtë. Nuk po them për njerëz që e kanë kaluar dritën e kuqe.
Sokol Balla: A jeni ju i sigurt që në grupin tuaj parlamentar, në grupin e kandidatëve që keni nxjerrë në këto zgjedhje, askush nuk dyshohet për vepra penale?
Lulzim Basha: Ai mund të ketë shpëtuar dhe mund të ketë ikur nga vendi, por nëse është ndjekur penalisht për drogë, vrasje, prostitucion…
Sokol Balla: Edhe prostitucioni, i cili është te krimet e rënda, pasi vetë e keni votuar.
Lulzim Basha: Do të shkojmë edhe tek ajo betejë, por është çështje tjetër ajo. Shqipëria ka më shumë se çdo herë tjetër djem dhe vajza që kanë mbaruar shkollën jashtë, po si na dolën këta kriminelë në Parlament. Ne bëmë rezolutën. Erdhën zgjedhjet. Ti heqim nga listat? Jo, të drejtat kushtetuese. Ke hallin e kushtetutës? Ne rregull, atëherë të bëjmë një pakt politik, duke mos e prekur Kushtetutën. Të zotohemi që një parti politike, të vërë gishtin te kandidati i një partie tjetër, ai kandidat të verifikohet. Në qoftë se verifikimi tregon se ka rekorde kriminale, atëherë vullnetarisht partia e tij ta tërheqë. Jeni dakord për këtë? Heshtje dy javë. Pas dy javësh dolëm në konferencë për shtyp, ku ju thamë shqiptarëve që kemi propozuar prej dy javësh për të hequr ata me rekorde kriminale. Edhe sot e kësaj dite oferta ime qëndron, për t’i hequr këta kandidatë. Kur vendosa këtë kërkesë për kundërshtarin politik, unë kam vullnetin politik ta zbatoj atë. Edhe nëse ata nuk e firmosin këtë pakt, në PD nuk ka vend për njerëz me rekorde kriminale. Sipas këtij standardi , dy rrugëdalje ka, ose të pranosh verifikimin, ose në rast se nuk e pranon për mua do të tërhiqesh nga gara.
Sokol Balla: Po qëndrimi që mbajtët për Mamurrasin?
Lulzim Basha: Ai nuk ka lidhje me këtë. Ai kandidat është larguar në kushtet e një trysnie të jashtëzakonshme.
Sokol Balla: A është ai vëllai i një deputeti të PD-së?
Lulzim Basha: Jo, nuk është ashtu. Bëhet fjalë për kandidatin tonë të parë. Kur ai është larguar ne kandiduam kryetarin aktual të bashkisë së Mamurrasit, i cili me vendim të KQZ dhe Kolegjit Zgjedhor është përjashtuar nga gara sepse nuk është regjistruar brenda afateve.
Sokol Balla: Pse keni shpallur bojkotin në një zonë që tradicionalisht voton djathtas?
Lulzim Basha: Ne nuk mund të pranojmë që në Kurbin të ketë një farsë. O do të ketë garë me dy kandidatë ose nuk do të ketë garë.
Sokol Balla: Kjo është komentuar nga disa gazeta si sinjali i parë që PD-ja mund të bojkotojë procesin. A është bojkoti në ditën e zgjedhjeve një opsion në tavolinën tuaj?
Lulzim Basha: Opsionet tona ne i parashtrojmë në mënyrë publike para qytetarëve. Ne i kërkojmë qytetarëve votën për të hequr lakun nga fyti. Ne nuk bëjmë lojëra me qytetarët, me platformat që kanë shpalosur kandidatët tanë. Ne jemi alternativa e pushtetit dhe ne kemi ofruar rrugëdalje për këtë.
Sokol Balla: Keni ngatërruar fushatë…
Lulzim Basha: Ata që morën vota duke premtuar uljen e çmimit të energjisë gënjejnë veten. Ata morën vota duke premtuar uljen e taksave për 97% të shqiptarëve, por i rritën taksat. Ata premtuan uljen e çmimit të karburanteve, por është ndër më të lartët në Europë. Ata i gënjen mendja se nga njëra anë mund të marrin votat dhe të bëjnë të kundërtën e asaj që kanë premtuar dhe mund të injorojnë vullnetin e njerëzve, por kjo nuk ndodh në demokraci, por në diktatura.
Sokol Balla: Duket se i premtoni njerëzve gjera të pamundura…
Lulzim Basha: Ne nuk mund të pretendojmë se jemi në gjendje normal dhe unë po jap platformën tonë të shpëtimit. Por të jesh i sigurt që kjo nuk është platforma ime e 2017-s, pasi ajo do të jetë e thellë dhe e detajuar kur të vijë momenti. Kjo është një paket emergjence shpëtimi sepse vendi po rrokulliset në greminë. Jemi baras me sirianët si azilkërkues. Nëse qytetarët votojnë për numrin 15 kanë votuar për platformën e Lulzim Bashës.
Sokol Balla: Pra, nëse fitoni këto zgjedhje do të kërkoni zgjedhje të parakohshme?
Lulzim Basha: Nëse marrim votën popullore për këtë paketë do t’i shkojmë deri në fund. Unë nuk kam qëllim kontrolli dhe pushteti. Unë dua ta zgjidh këtë hall, ata nuk kanë zgjidhje dhe merren me mua duke më sulmuar.
Sokol Balla: A keni në axhendë edhe zgjedhjet e parakohshme nëse i fitoni këto zgjedhje?
Lulzim Basha: Unë nuk kam asnjë interes tjetër, përveçse të zgjidh këtë problem të jashtëzakonshëm. Të heqim lakun nga fyti i shqiptarëve. Nuk them se kjo është platforma përfundimtare e Lulzim Bashës, por kjo është paketa emergjente e shpëtimit. Nëse votonin PD-në, Lulzim Basha do t’i shkojë deri në fund betejës për uljen e çmimit të energjisë, faljen e kamatëvonesave, uljen e çmimit të naftës, uljen e çmimeve në tërësi, rritjen e rrogave dhe të pensioneve. Qeveria ka dy zgjedhje nëse ballafaqohet me këtë verdikt të popullit, ose të pranojë platformën time, ose për ndryshe unë nuk kthehem nga kjo betejë.
Sokol Balla: Ju paraqisni një tablo shumë të errët të problemeve, aq sa thoni që po shkojmë drejt greminës. Atëherë, si e shpjegoni faktin që nuk ka asnjë sondazh që t’ju nxjerrë ju dhe koalicionin tuaj para?
Lulzim Basha: E keni fjalën për sondazhet që përdor qeveria? Këto janë pjesë e ankthit qeveritar. Unë besoj se puna do të na çojë përpara. Sigurisht që po bërë pune bën edhe gabime dhe ke mundësinë të korrigjohesh. Këta mendojnë vetëm për hile, por zullumi trashet dhe pastaj këputet. Ekonomia po bie, kjo tashmë është e qartë. Nëse shqiptarët sot janë më mirë, atëherë qytetarët të mos më dëgjojnë më mua. Më vjen keq të them se nesër do të jetë më keq. Me këto ritme për dy apo tre muaj nuk do të kenë më para për të paguar borderotë. Unë kam detyrimin para shqiptarëve si kryetar i opozitës të ofroj rrugëdalje nga kjo e keqe dhe rrugëdalje kam ofruar.
Sokol Balla: Zoti Basha, ju thoni se keni në dorë të bëni vetëm propozime. Megjithatë si kryetar i partisë më të madhe opozitare ju nuk keni vetëm mekanizmin e votës, por edhe mekanizma të tjerë se si kjo votë mund të fuqizohet. Ju sot paraqiteni në zgjedhje me koalicionin më të dobët që ka pasur ndonjëherë PD-ja. Keni pasur replika dhe tensione edhe me parti që i keni aktualisht në koalicion sepse nuk arritët të vinit në Durrës një kandidat, i cili potencialisht mund të kishte qenë kandidati që mund t’ja kishte bërë jetën edhe më të vështirë zotit Dako. Pra, ju vërtetë thoni vota, por vota ka edhe mekanizmat e saja dhe potenciali i votës së bashkuar të të djathtës nuk është maksimal në këto zgjedhje.
Lulzim Basha: Së pari aleanca jonë është me qytetarët shqiptarë. Ndërtimi i koalicioneve ka veçoritë e saja. Asnjë nga forcat që na janë larguar nuk janë në opozitë, por tashmë janë në prerin e qeverisë. Sot është e vështirë të qëndrosh për vlera në krahun e njerëzve, ndërsa për të marrë një copë torte nga qeveria është e thjeshtë. Këta që kanë ikur nuk janë larguar për çështje parimore, por për pazare. Ndërsa, Grida është kandidatja fituese në Bashkinë e Durrësit. As njerëzit që kanë sjellë me lista, as bandat, as paratë e pista që përdorin, nuk kanë për ta ndryshuar dot vullnetin e durrsakëve për të votuar pas 8 vitesh për një frymëmarrje Grida Dumën, në krah të cilës është edhe Agron Duka.
Sokol Balla: A keni një koment për akuzën që ju bëri PS-ja, lidhur me lejen që i keni dhënë vetes tuaj për të shtuar me një kat banesën private?
Lulzim Basha: Bëhet fjalë për një akt, i cili është bërë në transparencë të plotë sepse e kanë miratuar institucione të kontrolluara nga Rama dhe Meta. Për arsye që nuk dua t’i bëj publike, Lulzim Basha nuk arriti dot të ndërtonte një studio në banesën ku jetoj, që do ta përdorja për arsye private.
Sokol Balla: Thatë që PD do fitojë edhe në Tiranë, edhe në Durrës, megjithatë ju e dini që matematikisht Shqipëria ka një shumicë të majtë dhe tashmë duket se edhe bashkimi i këtyre dy partive të majta në front, ua bën një betejë të pamundur, me shifrat flas?
Lulzim Basha: Nuk ka matematike në zgjedhje. Ka votë të njerëzve. Këto zgjedhje janë një test i madh i demokracisë. Kemi një qeveri që ka ardhur dy vite më parë më një sërë premtimesh. Që të mos i realizojë, është e kuptueshme, por që të shkojë në drejtimin e kundërt, është prerje në besë e njerëzve. Kam besim të madh tek demokracia.
Sokol Balla: Nga çështja “Doshi” e këtej, keni një sulm të ashpërsuar ndaj LSI-së dhe kryetarit të saj.
Lulzim Basha: Nuk kam asnjë diferencim të dyshes Rama-Meta, përveç asaj të qasjes. Në Vorë dhe Pogradec, ku kandidojnë kandidatët e LSI-së, kemi presione kriminale dhe presione të tilla kriminale kërkojnë përgjigjen që kanë marrë dhe do marrin gjithmonë.
Sokol Balla: Mesazhi juaj i fundit, pse njerëzit duhet të votojnë numrin 15?
Lulzim Basha: Kandidatët tanë janë njerëz të vlerave,të suksesit. Janë njerëz sepse duan t’i shërbejnë qytetit, nuk vijnë që të kontrollohen as nga Gjiri i Lalzit as nga Surreli. Vijnë me ofertë konkrete për punësimin dhe uljen e taksave.
TCH
