Nga Donat Maloku
Bahtiri e Rakiqi, janë dakordur për të gjitha zhvillimet dhe iniciativat në Mitrovicë, por për ‘Parkun e Paqes’, që e ka vendosur vetë Goran Rakiqi, do të bisedojnë në Bruksel.
Kryetari i Komunës, Agim Bahtiri është takuar me kryetarin e Komunës së Veriut të Mitrovicës, Goran Rakiq dhe shefen e Zyrës Administrative në Veri, Adriana Hoxhiq.
Gjatë këtij takimi që ka zgjatur për rreth tri orë, ata kanë biseduar për situatën e përgjithshme në të dyja pjesët e qytetit, duke vlerësuar se situata e sigurisë aktualisht është e qetë, me tendencë të relaksimit të mëtutjeshëm, si dhe për vazhdimin e bashkëpunimit të mirë lidhur me çështjet me interes të përbashkët për të gjithë qytetarët e Mitrovicës.
Bahtiri dhe Rakiq në fokus të bisedës kanë patur çështjen e zhvillimit të proceseve, integrimin e qytetit dhe krijimin e kushteve për kthimin e të gjithë të zhvendosurve, shqiptarëve dhe serbëve në shtëpitë e tyre, si dhe për organizimin e një konference të përbashkët të donatorëve, ku do të prezantoheshin projekte të përbashkëta për të dyja komunat, me interes për qytetarët dhe qytetin në tërësi.
Po ashtu, Bahtiri i Rakiq janë shprehur të vendosur që t’i qojnë proceset përpara, në mënyrë që të zhvillohet vendi në përgjithësi dhe veriu në veçanti.
Rakiq me këtë rast i dha mbështetje Bahtirit, për opsionin e tij të zhvillimit ekonomik dhe mirëqenies sociale dhe integruese.
Bahtiri dhe Rakiq do të takohen sërish brenda këtij muaji, përkatësisht me 23 Qershor, në Bruksel, ku pritet të diskutohet edhe për çështjen e urës kryesore mbi lumin Ibër.
Në anën tjetër, zyrtarë komunal të Mitrovicës kanë theksuar se Kryetari i Komunës së veriut të Mitrovicës përkrah nismat dhe iniciativat e Kryetari të jugut të Mitrovicës, Agim Bahtiri.
Por tërë këtë e demanton barrikada ‘Parku i Paqes’, që gjendet i vendosur në urën kryesore mbi lumin Ibër nga vetë Rakiqi vit më parë.
Sipas zyrtarëve komunal për këtë çështje do të bisedohet në Bruksel në fund të muajit qershor. /tesheshi.com/
